[CONVIGNIS]

Lunis ai 2 di Mai, une convigne su “Smile again Friûl-V. J.” (al ven a stâi sui progjets a pro des feminis disfiguradis cul acit in Bangladesh e in Pakistan), al scree l’edizion 2005 di “I colori del vento”, par cure dal Coordenament des associazions culturâls e di volontariât sociâl di Glemone. Apontament a lis 20.30, li dal Centri parochiâl di Salcons. Al cjacare il ciroic plastic Giuseppe Losasso.

[AMBIENT]

Lunis ai 2 di Mai, li de Facultât di agrarie dal Ateneu furlan (aule M), si fasarà la convigne: “Sigurece alimentâr, derits dal consumadôr e dal ambient: garanziis pal consumadôr e pal citadin”. Lis voris a tachin a lis 16, te suaze des “Zornadis di studi Imc pe cualitât e pe sigurece alimentâr”.

[MUSICHE]

Tiziano Rupil il musicist cjargnel nassût in Svuizare al à componût une gnove opare. E je intitolade “Perdonami Papà!!!” e si pues scoltâle ancje tal so lûc internet: www.lamiamusica.com. Il sît al conte ancje la sô storie e al propon la musiche de sô armoniche.

[TEATRI]

Ai 2 di Mai e tache la prevendite dai biliets pal cabaret furlan “Murî di ridi”, imbastît dai “Trigeminus”. Il spetacul al vegnarà proponût li dal Teatri gnûf “Giovanni da Udine”, sabide ai 21 di Mai. I biliets si compriju di lunis fin sabide (16-19).

[SOCIETÂT]

Ai 2 di Mai di 60 agns indaûr, doi maçalizis triments a insaganarin il Friûl. A Vasinis trupis nazifassistis a coparin 60 fruts, feminis e umign nocents; a Cjaline e a Davâr a forin copâts tant civîi che partesans e cosacs in dut 121 muarts (20 civîi cjargnei, 6 partesans e 7 gjeorgjans aleâts cun lôr e 88 cosacs). I fats di Davâr (ch’a son riconstruîts tal libri gnûf crei di Luciano Di Sopra e di Rodolfo Cozzi “Le due giornate di Ovaro”) a son stâts memoreâts intune messe, cjantade dal vescul di Udin Pietro Brollo, li de glesie di Davâr, lunis di buinore.

[SALÛT]

E je in vore ancje in Friûl l’Associazion taliane volontaris lote cuintri dai tumôrs. I siei uficis a son a Udin in vie Dormisch 62, d’indulà che si svilupe l’ativitât di jutori pai malâts e pes lôr fameis, di prevenzion e di popolarizazion dai riscs. La clape e à il numar vert 800 822150 e po i numars telefonics 0432 400965, fax 0432 400940. Delegât regjonâl e je Cristina Morsanutto.

[CONCORS]

E sarà dedicade a Agnul Pittana la XXVI edizion dal “Premi San Simon” di Codroip. Romançs, contis lungjiis e ricoltis di contis par furlan a varan di rivâ li de Biblioteche (vie XXIX Otubar) dentri dai 10 di Setembar.

[MUSICHE]

Il Teatri gnûf di Udin “Zuan di Udin” ur da acet ai “Berliner Symphoniker” pal conciert di martars ai 3 di Mai, a lis 20.45. Diretôr al sarà il mestri israelian Lior Shambadal.

[TEATRI]

Si à timp fint ai 28 di Mai par dâsi in note pal cors internazionâl itinerant di perfezionament teatrâl “Progetto Thierry Salmon - la nuova Ecole des Maîtres”. La seconde edizion de iniziative culturâl, coordenade dal Centri servizis e spetacui di Udin (“Css”), si fasarà dai 26 di Lui ai 16 di Setembar.

[INFORMAZION]

Friûl, Belgjiche, Gales, Irlande, Slovenie e Spagne a cjapin part al progjet “Adum”, ch’al ven presentât miercus ai 4 di Mai, li dal Ateneu furlan. E je un’iniziative par meti in rêt, su la rêt internet, lis lenghis regjonâls d’Europe. Il ’seminari internazionâl di presentazion al tache a lis 16.30, li di palaç Antonini di Udin, in vie Petracco.