[CONVIGNIS]

Il professôr furlan de Universitât statâl di Milan, Remo Cacitti, al propon une lezion su “Cristianisim tra timp e eternitât: il cristian te storie”, inte suaze dal program de Scuele catoliche di culture. Apontament joibe ai 3 di Març, a lis 18, li dal centri culturâl “Paolino di Aquileia”, in borc di Trep 5, a Udin.

[DIASPORE]

Nol è trop ch’a son saltâts fûr i ats de convigne internazionâl su “La culture rumene fra Ocident e Orient: i umanesims grêc-bizantin, latin e sclâf”, celebrât li de Universitât di Jassi, in Rumenie, dai 21 ai 22 di Mai dal 2004. Il volum, dât fûr de “Fondazione Cassamarca” di Trevîs, al propon fra l’altri il salût di Nicolae Luca, president de Associazion culturâl rumene-furlane, e lis relazions dal president di “Efasce”, Luigi Luchini (“Il schisme grêc dal 1054, la colade di Costantinopul tal 1453, l’art bizantine e la sô influence su l’Italie”), e di Luigia-Amelia Bertig Toader di Costanze, ch’e à proferît une relazion su “La component taliane de civilizazion te provincie di Dobrugie”, là ch’e à cjacât dal Friûl tant che «pont di partence pe plui part dai talians di Dobrugie».

[MUSICHE]

Miercus ai 2 di Març, la “Propordenone” e à invdiât in Friûl la “Latvian Philarmonic Chamber Orchestra” par proponi al public pordenonês l’opare di Haydn “La musica instrumentale sopra le 7 ultime parole del nostro Redentore in croce”. Il grant conciert al tacarà a lis 21, li dal dom di San Marc.

[SPORT]

Miercus ai 2 di Març, a Glemone si presente il progjet “Atlantis” pe realizazion dal “Acqua center” cun pissinis, palestris, centri pal benstâ, ambients e laboratoris pe Universitât. La presentazion e tache a lis 17.30 li de Cjase dal student. A cjacararan Sebastiano Sanna president di “Atlantis”, i progjetiscj Fabio Oblach e Alfondo Degan Bianchet, il sindic Gabriele Marini e il diretôr dal cors di dotorât in Siencis motoriis dal Ateneu furlan, Pietro Enrico di Prampero.

[CORS]

Li dal “Cai” di Cividât (in vie Carraria 99), miercus ai 2 di Març, al tache il XV cors di speleologjie di I nivel par cure de Scuele di spelelologjie di Cividât e dai Grops spelelologjics “Valadis dal Nadison” e “Forum Julii Speleo”. Lis lezions si lis fasarà di miercus (9, 16, 30 di Març e 6 di Avrîl) e lis jessudis di domenie (6, 13 e 20 di Març; 3 e 10 di Avrîl). Par informazions si pues telefonâ a Bruno Pocovaz (0432 730771).

[CORS]

A sierin ai 3 di Març lis inscrizions pal “Cors di formazion di didatiche strumentâl” par cure dal Conservatori furlan “Jacopo Tomadini”. Lis lezions a laran indevant dal mês di Març fin tal mês di Decembar.

[CONVIGNIS]

Apontament cu l’“Ore des storiis dal mont”, miercus ai 2 di Març, a lis 17 li de Sezion pai fruts de Biblioteche civiche di Udin. La mediatore culturâl Lucila Gonzales ur contarà ai fruts dai 5 ai 10 agns cemût che si vîf tes isulis filipinis.

[CONCORS]

L’Institût regjonâl di studis europeus al organize il concors par students universitaris e di ogni gjenar di scuele “Europe e zoventût 2005”. Si pues partecipâ par talian o in altris lenghis (proferint un struc par talian) dentri dai 25 di Març. Il bant dal concors al è su la rêt des rêts.

[SCUELE]

Tant che jutori par svilupâ la comunicazion aziendâl e instituzionâl, l’Universitât furlane ur propon a aziendis e ents publics convenzions di garzonât dulà ch’a son ingaiâts i students di Relazions publichis. Lis competencis di chescj universitaris a van de planificazion e de gjestion des relazions esternis a la gjestion dai rapuarts cui media, de comunicazoin interne e de gjestion dai rapuarts umans a la comunicazion cumierçâl, comprindude l’organizazion di fieris, di mostris, di presentazions di prodots. Par contats al opere l’Ufici garzonâts dal Ateneu (0481 580332).

[CORS]

“Ialweb” al met a disposizion su la rêt des rêts un cors “online” par titolârs di impresis piçulis e mezanis su “Basilea 2”, la gnove normative su lis relazions cumierçâls cu lis bancjiis. Par informazions si pues contatâ il Centri “e-learning” dal “Ial (0434 505561).