[TEATRI]

Lis Provinciis di Gurize, di Pordenon e di Udin a lavoraran in convigne par che la Regjon e meti sù il Teatri stabil furlan. Lu à garantît il president provinciâl di Udin, Marzio Strassoldo, intune convigne cun Josef Agostinis, responsabil de petizion popolâr, prudelade dal mensîl “La Patrie dal Friûl”, dal sît www.friul.net (là ch’a son in linie i modui pes firmis), de “Societât filologjiche furlane” e dal “Fogolâr furlan di Milan”.

[POLITICHE]

Il 2005 al sarà l’An european de citadinance mediant de instruzion. Il Comitât dai ministris dal Consei d’Europe lu à proclamât, sielzint il sproc “Imparâ e vivi la democrazie”, par marcâ il puest de educazion par miorâ la cualitât de partecipazion politiche intune societât democratiche. Informazions tal lûc internet www.coe.int/T/E/Com/Files/Themes/ECD/.

[GLESIE FURLANE]

Miercus ai 2 di Fevrâr, la Glesie concuardiese e fâs memorie dai 350 agns de aparizion di Madone di Rose, daprûf San Vît dal Tiliment. Il vescul Ovidio Poletto al cjantarà messe a lis 18 li dal santuari. Il I di Fevrâr e joibe 3, i fraris a proponaran a lis 20.30 des veglis.

[INFORMAZION]

Fint ai 6 di Fevrâr Onde Furlane e torne a vivi 25 agns di radio, cuntun speciâl cuotidian ch’al fâs scoltâ lis vôs ch’a an segnât la sô storie. Tun panorame radiofonic regjonâl che tai ultins agns al è unevore mudât, fâ fieste pai 25 agns di transmissions al è un risultât che pôcs a puedin svantâsi. L’emitent e mande in onde une schirie di speciâi, là che si podaran sintî tocs di transmissions ch’a an fat la storie de radio, a tacâ dal 1980, cuant che il segnâl al è stât transmetût pe prime volte.

[ECONOMIE]

“Coldiretti”, “Ciase” e Universitât furlane a operin par otignî la denominazion “Dop” pe brovade furlane. L’iniziative le an cjapade 6 produtôrs des provinciis di Gurize, di Pordenon e di Udin, là che si prodûs il 90% di chest prodot.

[ECONOMIE]

Antonio Bressan di Gradiscje Imperiâl al è il gnûf president de “Coldiretti” di Gurize. Perît agrari e imprendidôr agricul, al à stât conseîr de Associazion regjonâl dai arlevadôrs e de Associazion taliane dai arlevadôrs di purcits. Cundiplui al è conseîr dal Consorzi dal persut di San Denêl.

[POLITICHE]

Pe Federazion regjonâl des Impresis piçulis e mezanis al va ben che l’Agjenzie regjonâl dal lavôr e coordeni lis politichis sul marcjât dal lavôr. Il president Marco Simeon, intervignint su la cuistion, al à declarât ch’al covente «un dissen di leç organic». In zornade di vuê, difat, e mancje une politiche ative pal lavôr e jù intarts sul garzonât a penalizin lis impresis.

[INFORMAZION]

Tal lûc internet www.resianet.org, a ’nd è un servizi gnûf. A son lis transmissions audio, curadis di Lorenzo Lettig e di Pamela Pielich par rosean. I prins destinataris di chest servizi, progjetât dal circul culturâl “Rozajanski Dum”, a son i roseans de diaspore sparniçâts pal mont.

[SALÛT]

Il puartâl www.infoanziani .it, vie pal mês di Zenâr, al à tacât a butâ fûr un sfuei dedicât al mont dai “over 60”. La distribuzion dal periodic, direzût di Sandro Di Filippo, e sarà sore nuie.

[NAZIONS]

Il lavôr politic-juridic e lenghistic-culturâl fat de “Lia Rumantscha” fra 1919 e 1996 al è strucât te opare “Rätoromanische Sprachbewegung” saltade fûr tal mês di Decembar dal 2004. L’autôr dal volum (edizions Huber di Frauenfeld) al è Gion Lechmann da Sumvitg.