[MOSTRIS]

Li de glesie di Sant Spirt di Ravasclêt al è esponût fint ai 9 di Zenâr il presep artistic di veri di Muran di Itamo Pustetto, innomenât mestri vedreâr di Vignesie, sfiol di un’antighe famee di Cramârs partîts de Valcjalde. Di chê strade, la “Pro loco” di Ravasclêt e à prontât une piçule mostre su la storie de famee, che si è slargjade ancje te Baviere, metint sù la grande cjase editoriâl “Pustet Verlag” (10-12 / 16-18).

[SOCIETÂT]

Miercus ai 5 di Zenâr, a lis 20.30 li dal auditorium des scuelis mezanis di Tarcint, a vegnin premiâts i vincidôrs dal “Premi Epifanie”. Chest an a saran il vescul mons. Alfredo Battisti, il poet Pierluigi Cappello, l’industriâl Andrea Pittini e il storic de fotografie Italo Zannier

[CULTURE]

Li de canoniche di Sauris Disot/Dörf, al è stât screât il centri storiografic “Museu di San Svualt”. L’insitituzion culturâl e restarà vierte di martars fint domenie (10.30-12.30). Par visitis prenotadis: 0433 866375.

[MOSTRIS]

Screade ai 30 di Decembar, si podarà visitâ fint ai 16 di Zenâr a Magnan la XIII edizion de rassegne “Il lunari fat in Cjargne”. Le à imbastide il Comun li des scuelis, in vie Monte Sori, cu la colaborazion di “il gjornêl” di Dimponç. A esponin i siei lunaris paîs cjargnei e de Sclavanie furlane (sabide des 14 a lis 18 e domenie des 10 a lis 14).

[INFORMAZION]

Il I di Zenâr al devente operatîf il regolament pe concession di contribuzions regjonâls a pro de editorie periodiche (leç 23/1965). Il decret cul regolament al è stât fat bon ai 3 di Decembar. Lis domandis pes contribuzions a an di jessi presentadis ogni an dentri dai 31 di Març.

[TEATRI]

“Tracce di un sacrificio” la scriture seniche componude e interpritade di Rita Maffei e di Fabiano Fantini e je stade proferide a Londre, intant dal “International Playwriting Festival”, rassegne di gnove dramaturgjie europeane zimulade cul “Premi Candoni Darte Termis” dal “Css”. Il spetacul inspirât al mît di Alcesti al è stât replicât 200 voltis in 9 sesons.

[GLESIE FURLANE]

Apontament a Aquilee pe zoventût de Glesie di Udin. Ai 5 di Zenâr, li de basiliche patriarcjâl, cuntune vegle a lis 20.30, al tacarà l’itinerari di preparazion a la “Zornade mondiâl de zoventût”, convocade pal mês di Avost dal 2005 a Colonie in Gjermanie.

[INFORMAZION]

La clape dai “Amîs di Vençon” e segnale il lûc internet dedicât a la vile. Si clame www.abintionet.it e al è viert pes contribuzions di ducj chei ch’a intindin di colaborâ.

[NAZIONS]

L’edizion pal 2005 dal lunari dal “Museo ladin de Fascia” al è dedicât ai anemâi des Dolomitis. Lis fotos a son di Doriano Brunel e di Alberto Bernard da Pera, i tescj di Stefen Dell’Antonio Monech. Il Museo ladin (museo@istladin.net) al è gjestît dal institût culturâl “Majon di Fascegn”.

[TEATRI]

Miercus ai 5 di Zenâr, la rassegne teatrâl dal cjanâl dal Dean “Guart a Teatri” e presente “Prima che sia giorno (Cercivento)”, a lis 20.45 li de “Cjase da Vicìnia” di Ravasclêt. A recitin e a cjantin Carlo Tolazzi e Caia Grimaz.