[SALÛT]

Si discor di prevenzion e di cure des malatiis oncologjichis, joibe ai 2 di Decembar, intant de seconde serade di educazion sanitarie organizade di “Avis-Aido” e di “Crôs blancje” a Danon (Friûl concuardiês sot di Vignesie). L’apontament al è a lis 20.30 li dal centri civic di vie Postumia, cul dotôr Simon Spazzapan dal “Cro” di Davian.

[SOCIETÂT]

Cuntun conciert li dal “Auditorium de culture furlane” di Gurize, joibe ai 2 di Decembar, al rive insom il progjet “I fruts gurizans par Bouaké”, inmaneât dal circul “Acli Margotti”. A lis 20.30 si esibissaran la corâl “C. A. Seghizzi”, la corâl de Basiliche di Aquilee e la Scuele di danze classiche e moderne. E presente Francesca Marcozzi.

[MUSICHE]

Joibe ai 2 di Decembar, la rassegne “La musiche dal nestri timp” e propon a vile Manin di Passarian, l’opare di Piero Sidoti “Errare è umane, perserverare… anche!”. Apontament a lis 20.45. Un altri spetacul – “Memorie visive”, progjetadis e direzudis di Giulia D’Andrea – al sierarà la schirie programade de Fondazion “Luigi Bon” di Culugne, domenie ai 19 di Decembar (a lis 19).

[MUSICHE]

Fint ai 23 di Decembar, l’associazion “Farandola” e propon la manifestazion “Jazz in Deposito”, li dal “Deposito Giordani”, in via Prasecco 13, a Pordenon. Apontaments ai 2, ai 9, ai 16 e ai 23 di Decembar.

[CULTURE]

Renzo Stefanutti, Mauro Daltin, Maurizio Mattiuzza e Paolo Patui, joibe ai 2 di Decembar (a lis 21 li dal ambient “Jazz&Wine”) a Cormons, a presentin la serade di leturis, di musichis e di peraulis “Diamo un calcio alle parole”.

[MUSICHE]

Joibe ai 2 di Decembar, il Teatri Pasolini di Çarvignan al presente il conciert multilengâl di “Radiodervish”, a lis 21.

[CULTURE]

La III “Convigne di toponomastiche locâl”, programade pal mês di Mai dal 2005 a Branc di Tavagnà, e frontarà la cuistion des aghis. Studiâts e passionâts ch’a intindin di ufrî des contribuzions a son invidâts a dâsi in note dentri dai 31 di Decembar. Par informazions e adesions: Sandro Comuzzo - 335 6705601 - sandrocomuzzo@virgilio.it.

[SOCIETÂT]

L’“Informezoventût” di Puart al è logât in “Galleria dei Portici” 12. I uficis a son vierts lunis (15-18); martars (10-12); miercus (10-12 / 15-18); joibe (10-12); vinars (15-18) e sabide (10-12). Tal Friûl Concuardiês, sot Vignesie, il servizi al è ufiert ancje tai Comuns di San Micjêl (vie Piave; martars e miercus, 15.30-17.30), a San Stin (place Moro, lunis e joibe, 15.30-17.30) e a Cjaurlis (martars, joibe e vinars, 15.30-17.30).

[CONVIGNIS]

Ai 3 e ai 4 di Decembar, l’Osservatori sui Balcans al organize a Vignesie une convigne intitolade “Vivi cence avignî? Bosgne Erzegovine e Cossôf sot de ministrazion internazionâl”.

[CORS]

Tal secont apontament dal cors di metodologjie e di formazion juridiche, l’Union dai juriscj catolics di Pordenon, vinars ai 3 di Decembar, e propon une lezion su “Un câs di derit penâl (simulazion processuâl)”, li dal auditorium regjonâl pordenonês, in vie Rome a lis 15. Ultin apontament ai 10 di Decembar, cu la presentazion de riviste telematiche “Forum Naonis” dal Ordin dai avocats di Pordenon.