[ECONOMIE]

Tal Friûl ocidentâl a operin 5 Centri par dâ di vore, metûts sù de Provincie. A son a Pordenon (cpi.pordenone@provincia.pn.it); a Manià (cpi.maniago@provincia.pn.it; a San Vît dal Tiliment (cpi.sanivto@provincia.pn.it); Spilimberc (cpi.spilmbego@provincia.pn.it); e Sacîl (cpi.sacile@provincia.pn.it).

[CORS]

Fint ai 6 di Novembar a son viertis lis inscrizions a la Universitât pe tierce etât di Spilimberc. Si pues dâsi in note ducj i dîs des 10 a misdì, gjavâts sabide e dîs di fieste, li de Cjase dal student (0427 40195). A saran proponûts cors di storie, di gjeografie, di tradizions popolârs, di medisine, di letaris e di lenghis.

[SOCIETÂT]

Un scandai dal “Eurispes” al à verificât che 3 fruts su 4 a mangjin prodots de tradizion locâl se in cjase a son presints ancje i nonos. A son stâts interpelâts dibot 30 mil fruts fra i 7 e i 13 agns. Stant po al “Censis” il 10% dai viei al ten cont de sô salût cun mangjâs biologjics.

[ART]

Dai 3 di Novembar ai 20 di Decembar, Mario Pauletto dal “Centri iniziativis culturâls” di Pordenon al presente il laboratori di dissen e di piture “De piture tradizionâl a la ricercje contemporanie”.

[MOSTRIS]

La “Trienâl europeane de incision” chest an e propon l’opare di Henri de Toulouse-Lautrec (1864-1901) a Pordenon. La mostre e restarà vierte li dal palaç de Provincie, in cors Garibaldis, fint ai 9 di Zenâr. Orari: martars-vinars 10-13 / 16-19; sabide e domenie 10-19.

[LIBRIS]

Ai 30 di Otubar al è stât presentât il libri “Notis di storie di Glemone”, là che il colaboradôr di “La Patrie dal Friûl” Franco Contès al à voltât par furlan ju articui dedicâts al so paîs dal grant pre’ Josef Marchet.

[SOCIETÂT]

Il “Centri di volontariât internazionâl” al fiesteze 20 agns d’impegn e di cooperazion internazionâl cuntune schirie di apontaments. Vinars ai 5 di Novembar al sarà ospit de clape Riccardo Petrella, professôr de Universitât di Lovanio e secretari dal Comitât pal Contrat mondiâl de aghe. A lis 9, li de Universitât (in vie Tomadini) al cjape part a la convigne su “La sustignibilitât te educazion, tal senari european”. A lis 15, al incuintre i sorestants regjonâi par presentâur la “La Cjarte de aghe dai ents locâi e dai citadins dal Friûl e di Triest” (li de Regjon, a Udin, in vie San Francesc). A lis 20.30 al sarà li de glesie di Çuian pal dibatiment su: “Par une societât dai derits e dai bens comuns”.

[DIASPORE]

Dai 4 ai 18 di Novembar, l’Efasce di Pordenon al organize un viaç in Argjentine par partecipâ a lis 3 convignis su “I zovins protagoniscj di une colaborazion economiche e culturâl gnove” a Rio Tercero/Cordoba; San Juan-Mendoza e Avellaneda; e Buenos Aires. Domenie 14, fieste finâl a Madone di Mont di Pablo Potestà.

[TEATRI]

La “performance” teatrâl “Finire in Paradiso”, dedicade di Paolo Zuttioni ai fats dai 4 di Novembar dal 1918, e vegnarà proponude joibe ai 4 di Novembar a Codroip (oris 21, palestre comunâl di vie IV di Novembar); ai 7 a Teôr (21.15, sale parochiâl) e domenie 14 a Udin (17.30, sale riunions dal parc San Svualt).

[MOSTRIS]

Joibe ai 4 di Novembar, li de Galarie comunâl d’art contemporanie di Monfalcon, si scree la mostre “Credi sempre ai luoghi comuni?”. La clape “ArteeFumetto” e esponarà oparis di Miela Reina, di Nicoletta Costa e di Sara Not. Sabide ai 6 di Novembar convigne cu lis autoris a lis 17. La mostre e restarà vierte fint ai 11 di Novembar (ducj i dîs 16.30-19.30; sabide e domenie 10-13/16-19.30).