[CONVIGNIS]

Sabide ai 2 di Otubar, li dal cjiscjel di Udin, l’Union dai juriscj catolics e organize un ’seminari su “Lis magjistraturis tal sistem politic instituzionâl”. Lis voris si vierzin a lis 9.30. Par informazions: 0432 512561 - fax 0432 26825.

[CONVIGNIS]

Un intervent di Serge Latouche, ch’al à elaborât par prin chê tese, al sierarà la convigne su “L’ocidentalizazion dal mont, daspò 15 agns”, programât a Udin, sabide ai 2 di Otubar. L’apontament al tache a lis 15.15, li di sale Madrassi, in borc Glemone. A intervegnin ancje Nicola Gasbarro, Franco Cassano e Umberto Allegretti.

[GLESIE FURLANE]

Il coleç Marconi di Puart, sabide ai 2 di Otubar e domenie 3 al fiesteze il cjadalan de fondazion tal 1704 e chel de seconde vierzidure, tal 1924. Lis fiestis a tachin a lis 20.30 di sabide cuntun conciert li de glesie dai sants Cristoful e Luîs. Domenie, a lis 10.30, convigne li de aula magna de Universitât; messe a misdì e po gustâ comunitari. A lis 20.30, li de glesie dal ’Seminari di Pordenon, conciert par organo e corâl.

[CULTURE]

Il circul fotografic furlan al fiesteze 30 agn di fondazion cu la manifestazion “Itinerari”, dai 2 ai 17 di Otubar li dal cjiscjel di Colorêt di Montalban. La mostre “Tra passato e presente del Circolo fotografico friulano” e restarà vierte ducj i dîs des 16 a lis 19 e sabide e domenie des 10.30 a lis 13. Joibe 7 e joibe 14 a vegnaran proponudis dôs seradis su la fotografie (a lis 20.30), cun Adriano Perini e Walter Criscuoli.

[MUSICHE]

Tal mês di Otubar, li dal ambient “Show Rondò” a Torean di Martignà, a vegnaran proponûts 3 concierts di sabide. Ai 2: Barbara Errico Jazz Contest; ai 9: Pagnutti&Collinassi (cu la presentazion dal cd “Fiaschidivini”) e ai 16: “Situbon Gang”. A tachin ducj a lis 21 e l’ingrès al è libar.

[ECONOMIE]

Par memoreâ il C cjadalan des sôs ativitâts, la Bancje di credit cooperaîf di Vilès e regale a la comunitât la sculture “Insieme”, realizade dal artist Adriano Visintin. La scree de opare, devant de bancje, e je stabilide par sabide ai 2 di Otubar, a lis 17. Al sarà presint il president de Regjon, Riccardo Illy.

[DIASPORE]

In prevision des fiestis pai 75 agns de Famee furlane di New York, ch’a colin dai 8 ai 11 di Otubar, sabide 2, li dal Palaçat di Cjavàs si presente il volum “Terrazzieri friulani in nord America - dalla pedemontana pordenonese a New York e dintorni”. Il libri, par cure di Michele Bernardon, al ven presentât a lis 16.

[CONVIGNIS]

Il “Museo dell’arte molitoria” e l’“Ecomuseo delle Acque del Gemonese”, li di mulin Cocconi di Ospedalet, a son daûr a organizâ la prime convigne regjonâl sui ecomuseus, ch’e sarà celebrade a Glemone ai 2 di Otubar.

[CONVIGNIS]

Vie pal mês di Otubar, il Museu di storie contadine di Fontanebuine di Pagnà al organize 3 convignis publichis. Ai 2 Roberto Pizzutti al cjacararà di prâts stabils; ai 9 Maria Abate e proponarà une lezion su “Il paisaç tal art”; ai 16 Giuliana Valentinis e presentarà “La vore poetiche di Valerio Marchi”. Lis convignis a tachin a lis 17.30.

[NAZIONS]

Domenie ai 3 di Otubar, 1 milion 634 mil e 266 slovens, in patrie e ator pal mont, a votin par rinovâ il parlament di Lubiane. Fra di lôr a ’nd è ancje 6 mil 610 ongjarês e 2 mil 767 talians ch’a gjoldaran dal vôt dopli, par votâ ancje un puartevôs par ognidune des dôs comunitâts nazionâls.