[SCUELE]

I gjenitôrs dai fruts ch’a frecuentin la Scuele bilengâl di Sant Pieri dai Sclavons/Speter, a son invidâts par une riunion di presentazion dal an scuelastic, joibe ai 2 di Setembar a lis 9. Lis lezions, chest an, a tachin ai 9 di Setembar.

[POLITICHE]

«Appaiono sconcertanti le dichiarazioni di alcuni esponenti dell’amministrazione comunale di Trieste dopo la vittoria di una slovena al concorso per Miss Trieste»: cussì Vittorio Sgarbi sul cuotidian triestin “Il Piccolo”, che ai 31 di Avost i à dedicât 2 pagjinis a la polemiche cuintrislovene, discjadenade pe elezion di Sara Jug, “colpevul” di jessi slovene di Gnove Gurize. «A Trieste, città aperta, città colta, città mitteleuropea – al zonte Sgarbi –, appare difficile accettare una slovena nel cinquantesimo anniversario di Trieste italiana».

[AMBIENT]

Dai 3 ai 12 di Setembar, i speleolics cjargnei, compagnâts di coleghis di Novare, a organizin a Sarajevo il prin cors d’introduzion a la speleologjie de Bosgne Erzegovine. L’iniziative e jentre intal progjet “Grotte senza confini”, tacât tal 2002, in colaborazion cu la Federazion speleologjiche bosniache. Tal cors a son ingaiâts Jasminko Mulaomerovic, president dal grop speleologjic di Sarajevo; Gian Domenico Cella, Antonino Torre, Simone Milanolo, Umberto Tolazzi e Marco Meneghin.

[SOCIETÂT]

Lis “Acli” (associazion cristiane dai lavoradôrs) dal Friûl ocidentâl a fasin la lôr fieste d’Istât dai 2 ai 5 di Setembar a Tramonç Disore. Joibe 2, proiezion dal cine di David Marie Turoldo “Gli Ultimi”; sabide 4 convigne su “Inspirazion cristiane e responsabilitât de politiche”.

[AMBIENT]

Al è timp fin tai prins di Novembar par presentâ domande par cjapâ lis contribuzions de Regjon a pro di chei ch’a instalin implants par produsi energjie cun biomassis legnosis forestâls e agriculis. Il regolament al è su la rêt te direzion www.regione.fvg.it/agricoltura/agricoltura.htm (Misura i - altre misure forestali).

[DIASPORE]

Il Circul furlan di Santa Maria, tal stât brasilian di Rio Grande, tal mês di Setembar al mandarà a studiâ ca de Universitât furlane altris 3 students. Si trate di Daniel Brondani (Inzegnerie eletriche), di Thales Braga Lobo (Derit) e di Michele Cassol Engel (rivât al ultin an dal cors di Medisine, ch’al fasarà un “stage” di Chirurgjie).

[DIASPORE]

La Federazion dai Fogolârs dal Canada, dai 3 ai 6 di Setembar, e fâs a Vancouver la sô XV convigne nazionâl “Fogolârs 2004, intitolade “Da mâr a mâr un puint che nus lee”. Dai 30 di Avost ai 3 di Setembar al è stât organizât ancje un “Pre-Congress Tour”. A colaborin il ministeri pal Multiculturalisim dal guvier federâl e l’Institût talian di culture.

[SCUELE]

A son viertis lis inscrizions pe scuele di musiche di Sant Pieri dai Sclavons/Speter “Glasbena Sola”. I uficis a son li dal condomini al Centro e a ricevin ducj i dîs di lunis fin vinars (11-12.30).

[NAZIONS]

Dai 5 ai 12 di Setembar, a La Ila/Stern/La Villa tal cjanâl di Badie, l’Institût ladin “Micurà de Rü” al presente la V edizion dai “Dis de leteratöra, teater, ert, musica y film”. Lis manifestazions culturâls a saran proponudis li de “Cjase de culture”. Un puest speciâl al sarà dedicât al cine (cu la partecipazion ancje di produzions furlanis) e a la produzion de prime “fiction” par ladin “Ci co cunta”.

[MOSTRIS]

Li dal centri civic di Maran, fint ai 18 di Otubar e je vierte la mostre: “Maran, tra mâr e tiere - testemoneancis archeologjichis de aree lagunâr”. Si podarà visitâle lunis (13-18.30); martars (8.30-13.30); miercus (15-18.30); vinars (8.30-12.30); sabide e domenie dome prenotantsi. A son esponûts 300 ogjets cjatâts tes lagunis di Maran e di Grau.