[MOSTRIS]

Inmagjinis d’epuche su lis monts e su l’aghe in Cjargne, fint ai 29 di Avost, a son protagonistis de mostre inmaneade des sezions “Cai” cjargnelis e dal Circul culturâl fotografic cjargnel. L’esposizion e je imbastide li di palaç Frisacco a Tumieç (di miercus fin lunis; 10.30-12.30 / 17-19).

[SOCIETÂT]

Setemanis d’impegn pai grops “Emergency” dal Friûl orientâl. Il grop di Monfalcon al proponarà i bancuts pe popolarizazion de organizazion no guviernative a Çarvignan il I di Avost (a lis 21.20, intant dal conciert di Fiorella Mannoia), a Migjee ai 6 di Avost (a lis 21, intant dal conciert pe pâs) e a Monfalcon ai 7 di Avost (a lis 21, intant dal conciert di Raiz te suaze di “Onde Mediterranee”).

[MUSICHE]

Il spetacul “Cornamuse itineranti” dal grop culturâl “Furclap” al vegnarà presentât a Glemone il I e ai 2 di Avost.

[CORS]

L’Universitât furlane e potenzie il so servizi sientific e didatic a pro di chei ch’a intindin il turisim tant che une “chance” pal Friûl ch’e domande cualitât e riflession. Dongje dal Master in Svilup turistic dal teritori, inmaneât de Facultât di Economie, dal an cu ven al funzionarà un cors di laureade gnûf, li de Facultât di Letaris, in Siencis e tecnichis dal turisim culturâl.

[POLITICHE]

Intervistât dal cuotidian talian “Messaggero Veneto”, il sindic di Pordenon Sergio Bolzonello al à confermât lis sôs critichis al guvier regjonâl di Riccardo Illy, massime in cont di riforme de Regjon. «...uno dei cavalli di battaglia della maggioranza è stato quello di ricostruire l’unità regionale attraverso un patto federativo che fissi regole certe nell’assegnazione dei trasferimenti, riducendo al minimo la discrezionalità. Su questo punto – al denuncie il sindic – siamo all’anno zero».

[POLITICHE]

La Cjamare dai deputâts e tache martars ai 3 di Avost il dibatiment su la riforme instituzionâl prudelade de Lighe. Il calendari dai lavôrs al previôt un dibatiment contingjentât di 110 oris dai 15 di Setembar ai 8 di Otubar. Il ministri des riformis, Roberto Calderoli al à pandût la sperance che il Senât al confermi lis modifichis de Cjamare dentri dal mês di Decembar, di mût che la tierce e la cuarte leture a sedin finidis dentri dal mês di Jugn dal 2005.

[CULTURE]

Ai 31 di Lui e je muarte Laura Betti, amie e colaboradore di Pieri Pauli Pasolini, e di 24 agns incà diretore dal “Fondo Pier Paolo Pasolini”, logât a Bologne dal 2003, cul so archîf di documents, di libris, di rivistis, di fotos, di cuadris, di regjistrazions dal poet e inteletuâl di Cjasarse. La Betti e je stade atore e regjiste. Tal 2001 e à realizât il cine-documentari “Pier Paolo Pasolini e la ragione di un sogno”.

[GLESIE FURLANE]

Ai 3 e ai 4 di Avost, la Glesie furlane di Concuardie-Pordenon e onore il so protetôr San Stiefin. Lis celebrazions liturgjichis a son programadis alì de catidrâl di Concuardie. A lis 9.30 di martars il vescul Ovidio Poletto al cjante messe cun ducj i siei predis. Altris eucarestiis a saran celebradis a lis 7.30, a lis 11.15 e a lis 18.30. Podaspò la catidrâl e restarà vierte pe adorazion fin miezegnot. Miercus, solenitât de dedicazion de catidrâl, messis a lis 7.30, a lis 10.30 e a lis 18.30. La liturgjie des 10.30 e sarà presiedude dal vescul emerit Pietro Giacomo Nonis cui cjalunis dal Cjapitul.

[TEATRI]

La storie di Paolo Santonino, compagnadôr dal vescul di Cjaurlis tes visitis pastorâls su pal cjanâl de Gail, in Carintie, in dite dal patriarcje di Aquilee, e je contade intun spetacul teatrâl scrit di Christoph Zerza e direzût di Michael Weger. Al ven proponût li dal teatri sul Wieserberg, a Dellach, dai 4 ai 7 di Avost e dai 12 ai 14 di Avost, tacant a lis 20.30. La rapresentazion e antecipe i apontaments pai 950 agns de parochiâl di St. Daniel.

[DIASPORE]

Tal “dossier” sui fruts migrants dal mensîl “Cittadini dappertutto” di Lui e di Avost, dôs pagjinis a son dedicadis a la realtât furlane. Un articul di Lorenzo Dugulin al cjacare dai 400 “non accompagnati tra accoglienza e rimpatri coatti” e chel di Silvia Canciani dai percors d’inseriment sociâl e di preparazion al lavôr par cure di “Casa dell’Immacolata” di Udin e dal “Centri di formazion professionâl” di Cividât.