[LIBRIS]

Comun di Çurçuvint, circul culturâl “La Dalbide” e clape culturâl “foes”, usgnot a organizin la presentazion dal libri di Luigi Maieron “La neve di Anna”. A lis 20.45, li dal municipi di Çurçuvint, al interven il zornalist Nicola Cossar.

[SALÛT]

Fintremai ai 13 di Jugn, li di vile Giacomelli di Pradaman, e torne la manifestazion “EssereBenessere” cun acjadiments, dimostrazions, “performance”.

[CONVIGNIS]

Dai 2 ai 5 di Jugn, la badie di Rosacis e sarà la sede dal simposi de Universitât di Clanfurt inmaneât dal “Universitäts Club Klagenfurt”. Uns 70-80 “manager” carintians si confrontaran su la cuistion: “Il podê: benedizion o maludizion?”.

[TEATRI]

Ai 14 di Jugn al scjât il bant pal cors internazionâl itinerant di perfezionament teatrâl “Progetto Therry Salmon - La nuova Ecole des Maîtres”. La prime edizion si le fasarà dai 3 di Avost ai 24 di Setembar.

[POLITICHE]

Dutis lis informazions uficiâls su lis votazions europeanis dai 12 e dai 13 di Jugn, lis primis de Union a 25 e cun 455 milions di eletôrs, si cjatilis tal sît speciâl: www.elections2004.eu.int. Dai 732 deputâts de gnove samblee di Strasburc, 16 a saran sielzûts te circunscrizion là ch’al è dentri ancje il Friûl, parie cun Venit, Emilie Romagne, Trentin, Sud Tirol e Triest.

[SALÛT]

E cjape dentri ancje 300 malâts de Aziende sanitarie dal Friûl di mieç e de Aziende ospedaliere Sante Marie de misericordie di Udin la sperimentazion prudelade dal ministeri de Salût e des Regjons Venit, Friûl-V. J. e Lombardie. I miedis di famee di chei 300 pazients, cuntune telefonade, a podaran otignî dutis lis informazions su la situazion sanitarie dai lôr assistîts. Referts e informazions a saran su la rêt. Il progjet sperimentâl si clame “Mitt” (model d’integrazion telematiche teritoriâl). A disposizion de Ass 4 a son 629 mil euros.

[ECONOMIE]

Il gnûf president regjonâl de Federazion des industriis piçulis e miezanis al è Marco Simeon. Cun lui a lavoraran te zonte Massimo Paniccia pal Friûl udinês; Gustavo Bomben pal Friûl ocidentâl; il president talian dal Grop zovins imprendidôrs “Confapi” Gianluca Pinna; il president dal grop zovins regjonâl Giovanni Maran e i presidents des categoriis dal len Gianni Burlina e dai transpuarts Rodolfo Flebus; e il tesorîr Bruno Candido.

[ART]

Joibe ai 3 di Jugn, li di palaç Antonini a Udin (in vie Petracco 8), si presente il libri di Dina Forgiarini “Le storie di sant’Andrea e la pittura murale del Trecento a Venzone”. A intervegnin Remo Cacitti, president de clape “Amici di Venzone” e Andrea De Marchi, dean de Facultât di Letaris dal Ateneu furlan.

[CORS]

La “Fondazion Bon” di Culugne e organize il prin “Centro artistico estivo” par fruts dai 6 ai 12 agns, stabilît dai 5 ai 16 e dai 19 ai 30 di Lui (8.30-12.30). Par informazions numar vert 800402088 e fax 0432 543049.

[MOSTRIS]

Li de “Beneska galerija” di Sant Pieri dai Sclavons e je vierte fint ai 12 di Jugn la mostre “Pogledi/Colpi d’occhio”, cun 24 fotografiis di 24 fotografs. Si pues visitâle ducj i dîs (fûr de domenie) 11-12.30 / 16.30-18.30.