[ECONOMIE]

Usgnot a lis 19.30, li dal municipi di Çurçuvint al finìs il cors su lis jerbis di salût organizât te suaze dal progjet “Jerbest”, ch’al è daûr a proponi chê preciose coltivazion ancje tes campagnis cjargnelis. Daspò de consegne dai atestâts, si discorarà dai svilups dal program.

[CONVIGNIS]

“Il Monachesimo come principio generativo della società”: s’intitole cussì la convigne inmaneade domenie ai 2 di Mai li de Badie di Rosacis, dal Centri internazionâl di studis “Luigi Sturzo” e de Fondazion Badie di Rosacis. Lis voris a tachin a lis 9 e, daspò des relazions di Emmanuele Morandi, di Giuseppe Bolis, di Nicolino Borgo e di Giuseppe Fornasari, al sarà proponût il conciert “Monachesimo benedettino e musica”, a lis 17 cu lis corâls “Giovanni Battista Candotti” e “Schola Aquileiensis”.

[AMBIENT]

Domenie ai 2 di Mai, il “Wwf” talian al celebre la “Zornade pes Oasis”. Di chê strade a saran viertis sore nuie ancje chês furlanis, ch’a son 3: lis risiervis naturâls “Fôs de Stele” e “Valle Canal Novo” a Maran e l’aree umide “Tre scalin del diavol” di Daçan. Li de Oasi di Miramar, te provincie di Triest, il “Wwf” e l’Institût sloven pe conservazion de nature” a firmaran un’intese di colaborazion. La clape ambientaliste e tornarà a bati dapardut par che l’Italie e cjapi sù positivementri la diretive comunitarie su la protezion des aghis e par ch’e sedi inmaneade une politiche ecologjiche integrade moderne pe gjestion de risorse idriche.

[MUSICHE]

Domenie ai 2 di Mai, la “Corale Fogolar” di Cuar di Rosacis, a lis 15.45 a Podresca di Prepot, te abitance dal centri studi locâl, e presente un conciert cun musichis di Palestrina, di Maiero, di De Marzi, di Zardini e di Vangelis. Al dirêç Evaristo Casonato.

[CINE]

Domenie ai 2 di Mai, “Dotìk. Gnûfs spazis par contats gnûfs”, la manifestazion dedicade dal Comun di Udin a la culture slovene, e presente i cines “Rezervni Deli” e “Evropa” di Damjan Kozole, a lis 20 li dal Teatri “Zuan di Udin”.

[MOSTRIS]

Dai 2 (inaugurazion a lis 17) ai 15 di Mai, li de glesie di Sant Antoni (in place dal Patriarcjât, a Udin), e je vierte la mostre: “Vojteh Ravnikar. Arhitektura”. Oraris: ducj i dîs des 16 a lis 20, te suaze de manifestazion “Dotìk. Gnûfs spazis par contats gnûfs”.

[MUSICHE]

Li dal “Teatritende” di Dieç, domenie ai 2 di Mai a lis 20.30, al ven eseguît il “Te Deum” par “Soli”, corâl e orchestre di Anton Bruckner, organist de basiliche di St. Florian; diretôr Severino Zannerini.

[NAZIONS]

Dal I di Mai, la Slovenie e je part de “Union europeane”. Informazions uficiâls sul Paîs confinant si cjatilis tai lûcs internet: www.europa.eu.int/comm/enlargement/slovenia/index.htm (sît uficiâl de “Ue” su la Slovenie); www.evropska-unija.si/ (sît de delegazion “Ue” a Lubiane); e www.sta.si/ (agjenzie di stampe slovene).

[GLESIE FURLANE]

Par dute la setemane, ancje la comunitât di Comeliàns e fiesteze Sant Florean, il martir cristian che chest an al cole il cjadalan centenari de sô muart (4 di Mai dal 304). Domenie 2 al è stât benedît l’altâr dal Parth, tornât a logâ te glesie di Maranzanis e di Povolâr, daspò dai luncs lavôrs di ristaur. Martars 4, lis Glesiis dal cjanâl di Guart a fasaran lis rogazions di Sant Florean, cjatantsi in convigne li dal Crist di Maranzanis, a lis 9 di buinore, par po cjantâ messe grande te glesie dedicade al martir. Sabide 8, la setemane si siere cuntun apontament culturâl a lis 20.30, li de sale “L’Alpina” di Comeliàns. Al vegnarà proietât il cine “Michael Parth in Cjargne”; Serenella Castri e Silvia Vanden Heuvel a cjacararan dal “flügelaltar” di Povolâr; e il plevan di Sant Zorç, pre’ Guido Mizza, al presentarà la “Passio” di Sant Florean.

[POLITICHE]

Sergio Cecotti, sindic di Udin e president di “Convergenza per il Friuli”, lunis ai 3 di Mai al cjacare a Buje di: “Cuâl Statût gnûf pal Friûl?”. La convigne, inmaneade dal grop “Autonomie e solidarietât”, e tacarà a lis 20.30, li dal Otel “Belvedere” di Urbignà.