[DIASPORE]

Fintremai ai 23 di Avrîl, li dal Stadthaus di Zurìc, in Svuizare, e restarà vierte la mostre su l’emigrazion taliane daspò de seconde vuere mondiâl. Fra il 1955 e il 1959, tal Paîs confederâl i talians a an rapresentât il 49% di ducj ju inmigrâts. Orepresint a ’nd è ancjemò passe 527 mil.

[INFORMAZION]

L’Universitât e resone sul pluralisim radiotelevisîf, confrontant il derit constituzionâl cun chel internazionâl e cun chel comunitari. Une convigne di pueste si fasarà dai 2 ai 3 di Avrîl, li dal municipi di Udin, in sale Ajace. Al organize il Dipartiment di Siencis juridichis.

[LIBRIS]

L’associazion culturâl “El Tomât” di Buje, vinars ai 2 di Avrîl, e presente il libri di Ermes Santi “Le cjase contadine furlane tra ’800 e ’900. Une visitazion tra imagjne e ricuart”. A lis 20.30, li de biblioteche comunâl, al cjacararà de vore Federico Rossi.

[MOSTRIS]

Dai 2 ai 5 di Avrîl, li de “Fiere di Pordenon”, “Institût olistic” e “Pordenon fieris” a organizin il “Salon des terapiis naturâls e dal benstâ psicofisic” (bioarchiteture, “wellness”, alimentazion, salût).

[CONVIGNIS]

Ultin apontament cu lis seradis “Cjatinsi”, a Çurçuvint. Vinars ai 2 di Avrîl, a lis 20.50 li dal municipi, Alessandra Silverio e Annarita De Conti a presentin “Çurçuvint platât”, percors di sunôrs e d’inmagjinis par tornâ a scuvierzi il patrimoni culturâl dal paîs cjargnel, tra claps, mûrs e cjasis. A organizin Comun e circul culturâl “La Dalbide”.

[SOCIETÂT]

Si discor di vuere e d’informazion, vinars ai 2 di Avrîl a Cjamin. Li dal teatri, a lis 20.45, Comun e biblioteche a an invidât a confrontâsi su “La lente deformante” i zornaliscj Giuseppe Liani e Roberto Aita.

[MOSTRIS]

Dal I ai 18 di Avrîl, li di palaç Tadea di Spilimberc, e restarà vierte la mostre sui cjastelîrs dal Friûl, par cure di Paola Cassola Guidi de Universitât furlane. A saran proferîts i plastics dai sîts di Gradiscje di Spilimberc, di Gradiscje di Sedean, di Gjalarian di Listize, di Savalons di Merêt di Tombe, di Varian di Basilian e de tombe di Sant Svualt di Udin.

[SOCIETÂT]

Pai 3 di Avrîl dal 2004, fieste nazionâl dal Friûl, a vegnin inmaneadis une schirie di manifestazions ator pai paîs di Tissan, Spilimberc, Merêt di Cjapitul, Migjee, Listize, Sant Scjefin, Flaiban e Sante Marie. Il program precîs si cjatilu tal lûc internet: www.lenghe.net.

[SOCIETÂT]

Un trop di clapis furlanis ancje chest an a organizin la “Fieste de Patrie dal Friûl”. I moments centrâi a saran a Spilimberc. Sabide ai 3 di Avrîl, i vicjaris gjenerâi des Glesiis furlanis di Concuardie, di Gurize e di Udin a cjantaran messe grande tal dom, a lis 10. Domenie 4, a misdì li dal municipi, si daran dongje i presidents des Provinciis di Gurize, di Pordenon e di Udin par une convigne cu la leture dal Deplom di Indrì IV che, tal 1077, al à metût sù il Stât patriarcjâl di Aquilee.

[CONVIGNIS]

Pai 927 agns de Patrie dal Friûl, la “Pro Flaiban” e organize une manifestazion culturâl intitolade “Disint Patrie” cuntune conversazion di pre’ Pierluigi Di Piazza su “Una identità friulana aperta al mondo” e cul recital di Laurin Zuan Nardin “Pieri e Jo” cun Maria Rosa Loffreda e Valentino Pagliei. Apontament sabide ai 3 di Avrîl a lis 20.30 li dal Centri sociâl di Flaiban.