[ART]

Il pitôr e restauradôr di Lauçà, Gianni Di Lena – colaboradôr ancje dal mensîl “la Patrie dal Friûl” –, al à vinçût il grant premi internazionâl “Scacchiera 2004”, setôr “strip”, a la rassegne di grafiche umoristiche “Umoristi a Marostica” (Vicenze). La ceremonie pe premiazion e je stabilide pai 17 di Avrîl. Al concors di chest an a an cjapât part 327 grafics di 41 Paîs.

[POLITICHE]

Lis stangjis dal confin fra Gurize e Gnove Gurize colarano pardabon il I di Mai di chest an, cu la jentrade de Slovenie te Union europeane? In realtât, finidis lis fiestis e lis celebrazions uficiâls pe unificazion europeane, ai 2 di Zenâr il confin, ch'al restarà viert pes marcjanziis, al tornarà a jessi sierât pes personis, parcè che la Slovenie no jentrarà tal compatât di Shengen insin al 2007.

[NAZIONS]

Franco Frattini (“Forza Italia”), ministri talian pai Afârs forescj, ai 21 di Fevrâr al à declarât che in Sud Tirol al è necessari di tutelâ il “grop lenghistic talian”, mediant dal ricognossiment dal “status di minorance teritoriâl”. L’idee, aprovade de “Cjase des Libertâts” dal Sud Tirol, e je stade sbeleade de comunitât todescje e ladine. I 3 candidâts a la guide dal partît di maiorance de Provincie autonime di Bolzan, “Svp”, a an declarât ch’e je une «marivee» (Dieter Steger); ch’e je «l’ultime provocazion dal guvier roman» (Elmar Pichler Rolle); e che la «sole veretât e je: 350 mil todescs e ladins a vivin intun stât di 60 milions di talians» (Walter Baumgartner).

[POLITICHE]

Il furlanist Sergio Cragnolini, dean dal partît “Fuarce Friûl” e conseîr comunâl di Bordan, al à realizât un sît internet par pandi la posizion dai contrârs a la “Provincie dal Friûl Disore”. La direzion eletroniche e je: www.provincia-altofriuli.it, dulà che i visitadôrs a puedin confrontâsi cui sustignidôrs dal “no” tal referendum dai 21 di Març.

[GLESIE FURLANE]

Dai 29 di Lui ai 11 di Avost, a Sant Jacum di Galizie (Santiago de Compostella) al ven celebrât il “Pelegrinaç europeu de zoventût”. Ancje lis Glesiis furlanis a son daûr a organizâ la partecipazion. Pai zovins de Diocese di Udin lis inscrizions si sierin ai 15 di Març.

[LIBRIS]

I fruts di Sant Micjêl dal Tiliment, dai 2 ai 9 di Març, li de Biblioteche a podaran rimirâ un centenâr di biei libris ducj par lôr, intant de mostre ch’e siere il progjet “Lib(e)ri per crescere”, par imparâ a contâ e a scoltâ storiis. Daspò dal cors par imparâ a contâ, la Biblioteche e screarà “Lis oris de conte”.

[AMBIENT]

Martars ai 2 di Març, a lis 20.30 li de Cjase de zoventût di Sant Vît dal Tiliment, seconde convigne dedicade a l’emergjence idriche par cure de clape “La Pira”, in convigne cui Cumons di Cordovât, di Sant Vît e di Sest. Renzo Scramoncin dal Consorzi Celine-Medune al cjacararà di difese idrauliche e di strategjiis par prevignî lis brentanis.

[MOSTRIS]

“Senza l’acqua che vita è?”: cussì e je intitolade la mostre dai students dal “Ipsia” di Pordenon, imbastide li dal “Spazi fotos” de Cjase dal student Zanussi. Si puès visitâle di lunis a sabide (9.30-19) e domenie (10.30-12.30 / 15-19).

[CORS]

Tal mês di Març e partissarà la IV schirie di apontaments “Capîsi in famee”, gnove scuele par gjenitôrs par cure de Comune di Remanzâs. Par informazions e par dâsi in note: 0432 667013 - 0432 667780.

[ECONOMIE]

Par fermâ la decjadince dai arlevaments di vacje sapadine, la “Union europeane” le à ricognossude tant che varietât menaçade di estinzion. Chê sorte di vacje, clamade par talian “grigia alpina”, e je arlevade in Svuizare, in Austrie e in Italie setentrionâl. Tal Sud Tirol si à vût une diminuzion di nemâi dal 30% e la Provincie autonime e à berlât il chivalì, otignint l’impegn de Union.