[CULTURE]

Sabide ai 3 di Zenâr, l’astronim furlan Ferdinando Patat, ricercjadôr a La Silla dal Chilì e tal “Southern Observatory” di Munic, al propon une lezion a Tumieç, intant de presentazion dal Centri astronomic de Polse di Cougnes, su la mont di Sant Pieri (Zui). La convigne e tache a lis 20.45, alì de sale parochiâl di vie Lequio.

[CULTURE]

Il grop di ricercje di Romans, “I Scussons”, al à butât fûr la gnove edizion dal “Lunari pal 2004”. La cuvierte de opare e onore indaûr Marcello Valdemarin (1903-1980), l’innomenât “Marcello dal cine”, che dal 1936 a la metât dai agns dal ’60 al à gjestît il cine “Impero” e altris dôs salis, a Migjee e a Grau.

[ART]

Il V Cuader dai “Amîs dai museus” gurizans al è stât dedicât ai artiscj di Cormons Alfonso Canciani e Antonio Camaur. Il studi lu à curât Maria Masau Dan e al è intitolât: “Alfonso Canciani e Antonio Camaur, due artisti friulani nella Vienna di Klimt”.

[SCUELE]

Prime a partî cu la riforme dai “curricula” universitaris, l’Universitât furlane e sarà la prime ancje a proponiur ai siei students lis laureadis specialistichis. Lis inscrizions a saran viertis fintremai ai 30 di Avrîl dal 2004 e, in chel fratimp, i students a podaran frecuentâ i cors dal IV an, ingrumant credits formatîfs. Par informazions: par Gurize: 0481 580311; par Pordenon: 0434 239411; par Udin: 0432 508786; numar vert: 800241433.

[ART]

E à tornât a vierzi la “Galarie d’art moderne Enrico De Cillia” di Trep di Cjargne. E restarà vierte di sabide e di domenie (9-12 / 15-18), te sede rinovade alì dal municipi.

[DIASPORE]

Lis comunitâts furlane e italo-brasiliane, sul spirâ dal 2003 a an vaît il cavalîr dal lavôr Luigi Papaiz, muart a Bologne. Nassût a Sest, tal Friûl Ocidentâl, tal 1924, al è stât une gjigant de industrie metalurgjiche tal setôr dai argagns pe sigurece. Grant benefatôr, nol à sparagnât risorsis e gjenerositât par prudelâ iniziativis di solidaritât e di beneficienze.

[NAZIONS]

Il Moviment pai stâts unîts d’Europe-Çampe europeane, daspò dal faliment de conference interguviernative di Decembar, al propon che la negoziazion pe Constituzion europeane e torni daurman a inviâsi. Pal moviment si à di rivâ insom prin des votazions dal mês di Jugn, magari lassant fûr i Paîs ch’a frenin. Il zûc democratic al domandarès che la Constituzion e jentràs in vore daspò de ratifiche di un ciert numar di Paîs e ch’e podès jessi miorade cence la necessitât de unanimitât.

[ECONOMIE]

Vie pal 2004, par valorizâ la sô propietât coletive, la Ministrazion frazionâl di Pesariis e comprarà une veture “fuoristrada”, un calibri eletronic par taiis e ju imprescj pe manutezion ordenarie de viabilitât forestâl e dal ambient dacîs dal paîs. Chescj inviestiments a smirin di rivâ a l’utilizazion dal bosc di produzion e di chel in enfiteuse cun personâl dipindint de Ministrazion. In zornade di vuê, il Comitât di ministrazion za nol vent plui plantis “in piedi”, ma midiant “cottimi di lavorazione” e cu la vendite “a strada”.

[LIBRIS]

Vie pal mês di Decembar, al è saltât fûr il numar 57 dai “Quaderni del Lombardo-Veneto”, periodic de associazion culturâl omonime di Padue. D’interès furlan un sonet dal editôr Domenico Del Bianco di Udin; un articul di Giovanni Fontana su “Aspetti drammatici della guerra 1915-18 Disobbedienza, fughe, pazzia”; e il scrit par cjargnel “Cjargne” di Micjel Ferigo, ch’al proferìs ancje un dissen dal Lûc dal Plan e di Vile di Mieç.

[MOSTRIS]

Fintremai ai 14 di Zenâr, sul cjiscjel di Udin (li de “Sala della Confraternita”), e je vierte la mostre “Templari”. Fra lis manifestazions colaterâls a son previodûts apontaments teatrâi (sabide ai 3 di Zenâr, a lis 20.45, li di sale “Madrassi” di borc Glemone) e convignis (vinars ai 9 di Zenâr, a lis 18, li di ”Librincentro”, in vie Viola). I oraris de mostre a son: 9.30-12.30 / 15-18 di martars fin sabide e domenie di matine (lunis sierât).