[INFORMAZION]

Ai 2 di Decembar, Marie Del Fabbro di Mediis di Soclêf e finìs 90 agns. Antoni Beline, tal editoriâl di “la Patrie dal Friûl” dal mês di Decembar, le clame la «Mari de “Patrie”». Femine dal fondadôr, Felix Marchi, e à direzût il sfuei dai autonomiscj furlans fra 1953 e 1965.

[AMBIENT]

In onôr di Celso Macor, che ai 29 di Decembar al è colât l’aniversari, centri studi “Rizzatti” e “Nuova Iniziativa isontina” a organizin la convigne: “Aghe: risultivis, stradis e destins”, in program martars ai 2 di Decembar, li dal auditorium “Luîs Fogàr” di Gurize. Lis voris a tachin a lis 17.30.

[CULTURE]

Il servizi informatîf dal lûc internet ladin: www.noeles.net al propon un lunc servizi sul CXXX cjadalan dai innomenâts “Saggi ladini” dal glotolic gurizan Graziadio Isaia Ascoli. Si cjatilu a la direzion: www.noeles.net/modules.php?name=News&new_topic=2. Ascoli (1829-1907) ancjemò dal 1873 al marcave l’afinitât peculiâr des fevelis ladinis dai furlans, dal ladins dolomitans e dai grisonês de Svuizare.

[SPORT]

Tal Friûl ocidentâl, il ski nol è dome il comprensori dal Plan dal Cjaval. Te Federazion dai sport dal Invier (“Fisi”), ch’e je direzude di Marco Gianessi, si dan dongje 21 societâts cun 2 mil e 50 inscrits. 300 a son sportîfs ch’a fasin ativitât agonistiche.

[SPORT]

La “Fisd” dal Friûl (Federazion taliane sport disabii) e je daûr a preparâ la seson 2003/04. S’e vegnarà la nêf, za vie pal mês di Decembar, a tacaran i cors promozionâi par pidimentâts fisics e mentâi, in colaborazion cu lis scuelis di ski. Dai 11 ai 14 di Fevrâr, a Entracque (Cuneo) si fasaran i campionâts talians “Special Olimpycs Italie”. “Fisd” e “Soi” dai 17 ai 24 di Març a organizaran sul Çoncolan un cors di specializazion pal insegnament dal ski a lis personis disabils.

[TEATRI]

Ebreus e Araps unîts su la sene: e je la scomesse dal spetacul “Costruire l’umano per rendere possibile la pace”, par cure dal grop teatrâl “Teatron Keshet L’arcobaleno”. Trê lis rapresentazions in Friûl. Lunis I di Decembar a Gurize, a lis 18 li dal auditorium de Culture furlane; martars ai 2 di Decembar, a Pordenon a lis 11 pes scuelis e a lis 20.30 pal public, li dal auditorium Don Bosco; miercus 3 a Udin, li dal teatri Giovanni da Udin a lis 11 pes scuelis e a lis 21 pal public. L’ingrès al è sore nuie.

[LIBRIS]

A Viene al è stât presentatât il “Wörterbuch der deutschen Mundart von Tischlwang/Timau - Glossario Timavese – Bartarpuach va Tischlbong”, publicât des Edizions “Praesens” in colaborazion cul “Verein der Sprachinselfreunden”. Il vocabulari di 600 pagjinis al proferìs 7 mil 408 lemis, tirâts dongje di Inge Geyer e di Anna Gasser. La vore, finanziade de “Ue”, e à vût fra i colaboradôrs il circul culturâl “G. Unfer” di Tischlbong/Tamau.

[NAZIONS]

Te prime domenie di Avent, in val Badie, il vescul di Bolzan bons. Wilhelm Egger ur à consegnât a lis Glesiis ladinis des Dolomitis il Libri dai salms pe liturgjie, il Lezionari pes domeniis e pai sants dal An C, il Libri des preieris pes parochiis de Val Badie, une ricolte di cjantis gnovis pes corâls parochiâls e dôs Novenis in onôr di Sant Josef.

[CONVIGNIS]

Li de biblioteche di Sant Vît dal Tiliment, si va indevant ai 5 e ai 12 di Decembar, a lis 20.30, cu la schirie di convignis: “Il Museu vie pe Sierade”.

[DIASPORE]

Li dal municipi di Gradiscje, al è stât presentât il volum: “Un’altra terra, un’altra vita. Emigranti isontini in Sud America tra storia e memoria 1878-1970” par cure di Franco Cecotti e di Dario Mattiussi.