S L’Osservatori regjonâl de lenghe e culture furlanis.
n.1
Jugn
2000
Editoriâl
L'Osservatori regjonâl de lenghe e de culture furlanis:Ce isal e a ce covential?
La politiche linguistiche dal O.L.F..
Doi compits primaris pe promozion de lenghe furlane. La formazion dai insegnants e la alfabetizazion
La cunvigne dal 15 di avrîl "la lenghe furlane inte scuele"
Contribûts pes scuelis. Lis domandis pal art. 27 de Leç Regj. 15/96: une analise daspò cinc agns.
La prime fase de campagne publicitarie pal furlan
Ents ricognossûts pe tutele de lenghe e de culture furlanis.
Societât Filologjiche Furlane
Informazions, incuintris, cunvignis
Ce isal e a ce covential?

L’Osservatori regjonâl de Lenghe e de Culture furlanis (O.L.F.) al è l’organisim di coordenament des ativitâts a pro de lenghe e de culture furlanis previodût de leç regjonâl 15 dal 1996, la leç di pupilance de lenghe furlane. L’Osservatori al è, di fat, une comission di nûf cualificâts esperts, indicâts di ents e istitûts regjonâi, une comission che e dure in cjarie cinc agns e che e inmanie progjets e voris a pro de lenghe furlane. La comission, il Comitât sientific dal O.L.F., si compon di doi esperts segnalâts de Universitât di Udin (Giovanni Frau, President dal O.L.F., e Raimondo Strassoldo), un de Universitât di Triest (Francesco Micelli), doi de Regjon FriûlVignesie Julie (Adriano Ceschia e Donato Toffoli), trê da lis trê provinciis furlanis (Carla Marcato par Gurize, Piera Rizzolatti par Pordenon e Silvana Fachin Schiavi par Udin) e un de Societât Filologjiche Furlane (Lucio Peressi).
Il compit principâl dal Osservatori al è, come dit, chel di promovi e di sustignî ativitâts a pro de lenghe furlane, ma ancje chel di sigurâ il coordenament des variis iniziativis in vore, par che a vedin une plui grande pussibilitât di pesâ sul stât e la condizion de lenghe. Une des azions primariis e je chê di poiâ e colaborâ a progjets pe preparazion di struments descritîfs come gramatichis o vocabolaris de lenghe, progjets cumò inviâts par cure de Universitât di Udin e dal Consorzi Friûl Lenghe 2000; une seconde azion, no mancul impuartante, si davuelç tal cjamp de didatiche de lenghe, cul aprontament di libris pai arlêfs des scuelis dal Friûl e la formazion dai mestris e dai professôrs che chei libris a varan di doprâju. Par chel ch’al rivuarde la promozion de lenghe, l’Osservatori al à inviât, tal 1998 e tal 1999, dôs campagnis di sosten al ûs dal furlan mediant de afission di cartei e manifescj che a proponevin une riflession su la impuartance de difese de lenghe furlane (Dìmal par furlan e Dopre la tô lenghe). Simpri tal setôr de promozion de lenghe, l’Osservatori al à colaborât cu la sede RAI dal Friûl ae realizazion dal carton animât Berto lôf, e al à stipulât convenzions cun radios e televisions regjonâls par programs informatîfs e di interès culturâl in lenghe furlane.

Federico Vicario