|
Il furlan al è stât moment fuart de identitât: al faseve coincidi teritori e oms. Al spieglave e al prudelave un mût di jessi, di vivi adun. Chest segnâl distintîf vuê al à pierdût la sô esclusivitât. L’atac di une lenghe deteritorializade come che e je l’inglês internazionâl al somee sprivâ di sens lis lenghis minôrs. Il talian al dopre aromai chest inglês par stropâ i vueits che i siei dialets e il furlan istès, ancje se di spes sot vie, a vevin jemplât in mût creatîf. Al è di ricuardâ di fat che i scritôrs furlans di nivel nazionâl a son ducj cence fal di marilenghe furlane. Tal moment che la television e chei altris imprescj mediatics a deventin la realtât, il furlan al mude il so significât. No plui jutori essenziâl pal talian, al devente moment necessari pe interioritât, pe difese de… privacy. Cheste forme semplice e ironiche di resistence ae solitudin de sdrume di int instradade di corints (no controlabilis) di informazion, e à dibisugne di consens, di struturis, di int che e feveli. Riscuvierzi la lenghe dai paris no je di fat operazion spontanie (dome la ignorance e je spontanie!), e domande invezit curiositât, inteligjence, vierzidure mentâl. E covente partant ancje di supuarts materiâi tant che dizionaris, regulis di scriture, messaçs mediâts, “masse critiche”. I covente duncje di cjapâ dentri chei che a son stâts dismenteâts, lassâts fûr. Par esempli i nestris emigrâts argjentins. Jessi e declarâsi furlans i ur coventà par definî dentri de grande curint de migrazion une strategjie par sorevivi, par deventâ grup cun cualitâts particolârs. La lôr lenghe mari e leve duncje sostignude fûr di ogni (meschin) calcul di interès. Il sfuarç di tornâ a paronâ un strument espressîf tant che il furlan, intant che nol varès inibît la cognossince dal talian, al varès rindût inutil doprâ l’inglês internazionâl tra parincj nancje lontans. Cussì nol è stât e dome su la (sospietabil) cuarde dai “rientri” de Argjentine, un monopoli dal scuasit nuie, si sta zuiant un rapuart di rûts interès politics, rimplaçant cun titui e fotos di gjornâi e televisions locâi chê puaretât di relazions umanis che la fiducie e l’ûs sistematic dal furlan a varessin tignût indaûr. A rivuart di chest l’OLF al è imprest impuartant soredut se al ten sù la mude di disdivore e al scombat la sô bataie di libertât di cussience e di espression. |
|
|
