A son stâts presentâts ai 19 di Setembar a Udin, ae presince de vicepresidente regjonâl e assessore ae culture Alessandra Guerra, dal diretôr dal ufici scolastic regjonâl Bruno Forte e dal president dal OLF Zuan Frau, il tierç, cuart e cuint volum di Tescjplui, il libri di leture bilengâl pal secont cicli de scuele elementâr. La iniziative, davuelte de Regjon Friûl Vignesie Julie in convenzion cu La Scu-la Editrice di Brescia, e rive doi agns daspò de publicazion dai volums 1 e 2 de schirie, destinâts invezit ai fruts di prime e seconde elementâr. I volums, gjavâts fûr dal libri di leture in lenghe taliane Testipiù di Alfio Zoi e Donatella Zoi Bruno, a son stâts za distribuîts tes scuelis dai comuns di lenghe furlane des provinciis di Gurize, Pordenon e Udin.

KIT LINGUISTIC PAI COMUNS DES PROVINCIIS DI UDIN E GURIZE

Lis Provinciis di Udin e Gurize a son daûr a preparâ un “pacut su la lenghe furlane” di distribuî a ducj i Comuns tal lôr teritori che a fasin part de aree storichementri di lenghe furlane. Il kit, pensât par judâ i Comuns a davuelzi la ativitât burocratiche in lenghe furlane, al è formât di un coretôr ortografic e un dizionari su CD-ROM, di un manuâl pratic su la lenghe furlane e il lengaç aministratîf, e di une schirie di ats za tradots di doprâ tant che modei. La distribuzion dal kit, costât 30 mil euros, e varès di jessi davuelte dentri de fin dal an. La Provincie di Udin e je po daûr a inmaneâ la seconde edizion dal so cors di lenghe furlane par dipendents publics, che chest an al varès di jessi viert a ducj i dipendents publics di cualsisei aministrazion intal teritori provinciâl.

SI DISCÔR A UDIN DI RAI E REGJONS

Si è tignude ai 9 di Setembar a Udin, su iniziative dal Comitât regjonâl pes comunicazions (Corecom), une taule taronde sul teme “RAI e regjons”. L’incuintri al à viodût la partecipazion de diretore de testade giornalistiche regjonâl, Angela Buttiglione, dal president de Regjon Renzo Tondo, dal president dal Consei Regjonâl Antonio Martini e dal sindic di Udin Sergio Cecotti, invidât tant che component dal Comitât tecnic de Presidence dal Consei pe aplicazion de leç di tutele des minorancis, che al à tornât a bati su la necessitât che la RAI e metedi in vore la programazion in lenghe furlane previodude de leç. Intal incuintri al è stât ricuardât che cu la fin dal an al scjât il contrat di servizi tra RAI e Ministeri des Comunicazions, dulà che si stabilissin programazion e finanziaments RAI, e si è marcât la urgjence di intivâsi par che il furlan al sedi fat jentrâ tal contrat.