|
La cinematografie furlane e pues contâ vuê su plui di 70 films. Si trate di curts, mezans e luncmetraçs realizâts in massime part in video, cuntun budget une vore bas. La date storiche che e segne il scomençament dal cine in lenghe furlane al è il 1982, cuant che Vittorio Cottafavi al firmà Maria Zef. Ma o podìn dî che al è a tacâ dal 1988, an de I e edizion de Mostre dal Cine Furlan, che si invie une produzion che cul lâ dai agns e deventarà simpri plui impuartante. Documentaris, films di finzion, sperimentazions, animazions, videoclips, films didatics a marchin chescj 20 agns di storie. Une storie a voltis intrigose e contraditorie ma simpri une vore stimolant.
Vuê il cine furlan al pues contâ su autôrs, tecnics e atôrs di grande professionalitât, ma che a àn bisugne di jessi sostignûts sul plan finanziari ma soredut su chel normatîf. Di fat une leç regjonâl specifiche sul cine, cuntune comission che e varès l’assum di dâ un parê su la cualitât dai progjets e su la lôr fatibilitât e chê di meti in sinergjie lis realtâts di chenti par une politiche distributive razionâl, e coventarès par no dispierdi energjiis e bêçs e par dâ une prospetive reâl ai autôrs.
Dut câs o podìn definî la situazion in maniere une vore positive. No dome o assistìn, almancul di cuatri agns in ca, a une incressite qualitative e cuantitative dai lavôrs produsûts ma ancje a une difusion su dut il teritori. Proiezions di films furlans a vegnin fatis intai comuns e intes scuelis e lis televisions a scomencin a interessâsi a cheste produzion. Tal 2001 Telefriuli al à mandât in onde vot seradis di cine cuntun dai plui grancj sucès di scolte che a vedin mai regjistrât. Inte Istât dal stes an, il CEC al à presentât trê seradis al “Torso” cuntune alte presince di public. Robe ancjemò plui significative la programazion al cine “Centrale” di Udin di Buris, libars di scugnî vignî di Massimo Garlatti-Costa (li che la int e faseve a sburtons par jentrâ), e l’inseriment, te programazion normâl dal CEC e intune sale comerciâl di Udin, dal ultin film di Lorenzo Bianchini Lidrîs cuadrade di trê. Il film al à vût, darest, une recension e une lungje interviste al so autôr su la riviste francese Cinéastes. Dutis chestis iniziativis, e soredut l’intîf che a cjatin intal public, a dimostrin che il cine furlan al à potenzialmentri un avignî.
Ancje la edizion in videocassete di un trop di voris e sta cjapant. La dificoltât se no altri in chest setôr e je ancjemò chê distributive. Intai agns passâts a son vignûts fûr in VHS Prime di sere e Pieri Menis, ricuarts di frut, ducj i doi di Lauro Pittini; ma ancje i lavôrs di Remigio Romano (Une zornade a seselâ, Il purcit e In chel dì da lis mês gnocis) dutun cui films di Galdino Zuliani I mistîrs de vile e Tramont.
La Universitât di Udin e à vût produsût e editât dôs voris di Dorino Minigutti (Bielscrivint e Intrics), doi films che a metin adun la finzion cu la finalitât didatiche. Pes edizions plui resintis o volìn segnalâ Farcadice di Carlo Delved e Luca Peresson e il za menzonât Buris, libars di scugnî vignî di Massimo Garlatti-Costa, Meni Fari, 40 e ...Buine!!! di Giancarlo Zannier e, no ancjemò jessude ma za anunciade, la version furlane di Il tierç lion di Manlio Roseano. |
|
|
