|
“Îr la aule di Strasburc si à mudât inteTor di Babêl”. Chest al fo il coment scaturît e scandulizât di un cuotidian francês jessût ai 17 di Otubar dal 1981. La dì prime il Parlament European al veve vût fate buine pe prime volte une risoluzion a pro de tutele des minorancis e tancj di lôr a faserin la sô declarazion di vôt favorevul fevelant inte sô lenghe: cui par ocitan, cui breton, cui par galês, cui par irlandês… Chês lenghis, diviersis di chês maioritariis e “nazionâls” dai stâts e duncje pal plui ignoradis de bande des instituzions o ben consideradis tant che maglis di sporc di scancelâ sul vistît bon de nazion “una d’arme, di lingua, d’altare”, a jerin stadis dopradis intune ocasion uficiâl intun lûc uficiâl e preseôs e soredut al jere stât fat bon un document che al ricognosseve la impuartance, in Europe, di dutis lis espressions culturâls. Daspò di vincjeun agns de sô aprovazion, la Risoluzion suntune Cjarte des lenghis e culturis regjonâls e une Cjarte dai dirits des minorancis etnichis, cognossude miôr cul non dal so relatôr, Gaetano Arfè, e continue a vê un valôr une vore grant, ce dal pont di viste storic ce pai siei contignûts, no cate i limits di aplicazion concrete che a àn vût fin cumò dutis lis risoluzions di cheste fate.
La impuartance storiche de prime Risoluzion Arfè pes minorancis (tal 1983 e vignarà fate buine une seconde simpri cul parlamentâr socialist italian tant che relatôr) e dipint di plui fatôrs. Prin di dut, la sô aprovazion si inserìs ad in plen inte suaze di un moment di disvilup dal procès di integrazion europeane, marcât juste apont dal fat che tal 1979 il Parlament european al jere stât elezût pe prime volte diretementri de bande dai citadins dai Stâts. Chest al fo, pal sigûr, un element di incressite in sens democratic stant che, cun dut a chel che lis sôs competencis a jerin (e a son ancjemò) une vore limitadis, il gnûf Parlament al cjatave gnove fuarce te legjitimazion dal vôt popolâr e cheste e fo un sburt in plui par chei parlamentârs che za te sentade dai 26 di Otubar dal 1979 a tacarin a lavorâ suntun test che al frontàs une cuistion di democrazie tant che chê des minorancis. Il secont element al è chel di vê viert un troi là che in cualchi maniere dutis lis istituzions europeanis a àn scugnût incjaminâsi. In particolâr, la aprovazion de Risoluzion e veve parât vie ducj i dubis che chescj argoments no jentrassin dentri des politichis comunitariis, cu lis risultis di sburtâ la Comission a intervignî - cu la viertidure di une gnove linie di belanç par finanziâ progjets e iniziativis in riferiment ae tutele - e di continuâ, tal Parlament european, a profondî chestis cuistions. Fûr dal contest comunitari, su la fonde de Risoluzion Arfè e de scuasit contemporanie (fate buine ai 7 di Otubar dal 1981) Racomandazion 928 de bande de sô Assemblee consultive, intal Consei di Europe al scomençà il procès che al puartà ae adozion de Carte europeane des lenghis minoritariis e regjonâls.
Dal pont di viste dai contignûts la Risoluzion Arfè e rapresente un svolt epocâl. In maniere organiche e articolade i temis dal pluralisim linguistic a vignivin frontâts no dome tant che peâts a un ambit dome culturâl, ma intun contest globâl, ven a stâi ancje politic, juridic e di orientament a clâr europeist. In struc, il pluralismi linguistic al vignive ricognossût tant che valôr comun di une Europe che e je e e à di jessi “une e plurâl”, si palesave che meti in vore politichis di tutele des minorancis e la promozion des lôr lenghis e culturis al jere ricognossi dirits e dâ aplicazion a principis di democrazie sostanziâl, e si sclarive che lis comunitâts etnichis in condizion di minorance a son une risorse pe costruzion de Europe unide.
Dutis robis che in timps là che la circolazion dai euros e je pene inviade al è ben no dismenteâ. |
|
|
