Friûl.net

Sabide ai 25 di Genâr, la comedie di Alviero Negro “Joane” e scree la XXIV “Rassegna Teatro Spontaneo” di Denemonç. I spetacui a saran proponûts a 20.30, li dal Centri sociâl di Denemonç, fintremai ai 31 di Mai. Chei altris apontaments a colaran ai 15 e ai 29 di Fevrâr; ai 7, ai 21 e ai 28 di Març; ai 4 e ai 18 di Avrîl; e ai 31 di Mai (unic spetacul a 17.30).

Ai 17 di Genâr, li dal “Museu dal Ebraisim talian e de Shoah”, logât a Ferrara tes vieris presons, si scree il gnûf percors multimediâl “1938: l’umanità negata”, nassût par memoreâ l’LXXX innovâl de aprovazion des leçs razistis dal Fassisim, ch’a àn inviât la persecuzion dai Ebreus in Italie e rindude possibil, cualchi an dopo, la depuartazion tai cjamps di disvinidriment naziscj de Comunitât israelitiche taliane.

Un Cors pai insegnants, ai 13 di Genâr, al à screât l’edizion 2020 di “Semi di giustizia”, il proget di formazion a la cooperazion e al volontariât par cure di “Accri”, di “CeVI”, di “Cvcs” e di “Aiab”. A saran proponudis altris 5 seradis. Si fevelarà su “Chi distrugge l’Amazzonia? Il legame tra la coltivazione della soia per produrre mangimi e la deforestazione”, ai 30 di Genâr; ai 6 di Fevrâr si podarà viodi il documentari “Behind the Green Curtain” su la monocolture dal eucaliptus tal Brasîl. Il confront dai 12 di Fevrâr al frontarà la cuistion: “Gas, grandi infrastrutture e cambiamenti climatici: quali implicazioni e quali prospettive per un futuro giusto e sostenibile?”. L’ultin apontament al sarà dedicât al Lisunç, aghe transconfinarie (cun “Balkan River Defence” e “Legambiente” e cu la vision dal documentari “The Undamaged” (ai 20 di Fevrâr).

Dai 21 di Genâr ai 9 di Jugn, il “Club Soroptimist Alto Friuli” al propon i 6 apontaments de rassegne “Leturis in Biblioteche e no...”. L’edizion di chest an, a Tumieç, e sarà intitulade “La memorie… i derits, l’identitât, la bielece, l’amôr”. Lis convignis a tacaran a 18, tes zornadis di martars, une volte al mês (ai 21 di Genâr; ai 11 di Fevrâr; ai 14 di Avrîl, li de Biblioteche; ai 10 di Març e ai 12 di Mai, li de Librarie “Friulibris”; e ai 9 di Jugn, pal unic apontament a 17).

“Cjase Russolo”, dulà che il Cumon di Puart al proferìs la sô “Galarie permanent” dedicade al pitôr musicist Luigi Russolo, nassût te capitâl dal Friûl concuardiês sot Vignesie dal 1855, e je vierte cui oraris: lunis, 9-13 / 14-18; martars-vinars, 9-18; sabide, 9-13. I cuadris in mostre a son: “Città in festa”, “Collina”, “Linee Forza della Folgore”, “Impressioni di bombardamento”, “Autoritratto”, “I tre Pini” e “Sera”.

Il “Museu de Mode e des Arts aplicadis” di Gurize al fiesteze vincj agn di ativitât cu la mostre “Riis, cuadris e rosis”. Si podarà visitâle sul cjiscjel fintremai ai 3 di Mai. Oraris: martars-domenie, 9-18.15. Vie pes domeniis di Zenâr e di Fevrâr no si varà di paiâ il biliet.

In face dal disastri de Autralie, des montanis da l’Indonesie e dai 20° di cjalt dal Invier de Norvegje..., no si pues fâ fente che il mont nol sedi daûr a colâ intune vuate cence confins. L’ultin chivalì su la crise climatiche lu à ripetût “Fridays for future Italia” (#fridaysforfuture) e si pues leilu tal lûc internet di “Comune.Info”. «Di fronte a tutto questo, la politica non muove un dito. Noi però non resteremo a guardare mentre il nostro futuro va in fiamme!» – a scrivin i zovins –. Ai 24 di Avrîl (#24Aprile), «parteciperemo al quinto Sciopero globale per il clima, manifestando in oltre cento città italiane e coinvolgendo miliardi di persone in tutto il mondo, decise a difendere il futuro loro e delle generazioni a venire».

Il Ministeri dal Ambient talian al à publicât la tierce edizion dal «Scandai sul stât dal capitâl naturâl in Italie”. Te presentazion, si marche une bisugne streme pe Ministrazion publiche: «la necessità di rafforzare l’impegno affinché siano messe in atto le principali Raccomandazioni individuate nelle due prime edizioni del Rapporto, volte all’integrazione del Capitale Naturale nelle valutazioni e nei sistemi di monitoraggio delle politiche, nelle politiche economiche e nella pianificazione territoriale, con l’intento di assicurare un contributo significativo alla realizzazione degli obiettivi globali tracciati dall’Agenda 2030 per una crescita sostenibile che l’Italia deve continuare a perseguire per le generazioni presenti e future». Il document si pues leilu fûr par fûr su la rêt des rêts.

Ducj pues cjapâ part al concors “La fotografie racconta il bosco”, inmaneât de Societât taliane di Selvicolture e di Ecologie forestâl “Sisef”. Fintremai ai 14 di Novembar, si podarà cjariâ i “files” tal lûc internet de Societât, dopo de registrazion personâl. La cuistion di svilupâ e je chê dal rapuart fra boscs e mudaments climatics, cu la necessitât di une gestion sustignibil par protegi lis funzions dal bosc menaçadis de crise ambientâl.

La Galarie comunâl d’art contemporani di Mafalcon e presente, fintremai ai 2 di Març, la mostre “Lucio Fontana e i mondi oltre la tela. Tra Oggetto e Pittura”, par cure di Giovanni Granzotto e di Leonardo Conti. Orari: di joibe fin lunis, 10-13 / 15-18.