Friûl.net

S’e rivarà a tirâ dentri ancje altris Cumons, l’“Assemblee de Comunitât lenghistiche furlane” e podarà deventâ «un vêr Parlament dai sindics dal Friûl» e a «fâ sintî la sô vôs intal confront su la riforme dai Ents locâi e su lis formis gnovis di gjestion dai comprensoris». Cun chest obietîf, il sindic di Volveson e di Darzin, Markus Maurmair, al à cjapât sù l’incarghe di president. Cun lui, al lavorarà come sotpresident il sindic di Dartigne, Alessandro Marangoni. La votazion e je stade fate a Udin, par dâi la volte a Diego Navarria, ch’al à finît il so mandât di sindic di Cjarlins cu lis votazions dal mês di Mai stât. La Samblee e je l’organizazion ch’e rapresente i Comuns dulà che la lenghe furlane e je ricognossude daûr de leç statâl 482/1999. In zornade di vuê, a son notadis 119 Aministrazions su 173 ch’a varessin dirit.

A Pordenon, lis firmis su la propueste di leç pe protezion dai Bens comuns si tirin sù ducj i dîs de setemane li dal “Urp” dal Cumon, te plaçute Calderari 1. I oraris a son: lunis-vinars, 9.30-12.30; lunis e joibe ancje 14.30-17.30. Par informazions su l’iniziative popolâr: www.generazionifuture.org. La ricolte e larà indevant fintremai ai 20 di Avost.

Dutis lis clapis che, in Friûl, a son daûr ingaiadis te ricolte di firmis pe Propueste di leç d’iniziative popolâr ch’e domande un ricognossiment vêr dai Bens comuns, vinars ai 26 di Lui, a organizaran il “Firma Day”. In chê zornade, i partesans dal Forum regjonâl dai Bens comuns e da l’Economie solidarie a buinore a invidaran i citadins a firmâ tai Cumons e po, di 20 fin migegnot, a tiraran sù firmis cun taulins di pueste tes placis e su lis stradis. L’iniziative e je coordenade midiant dal profîl “Facebook” https://www.facebook.com/events/2357979131137293/.

Ai 26 di Fevrâr dal 2020 e tornarà a passâ par Triest e pal Friûl la “Marcje mondiâl pe pâs e pe noviolence”, di strade fra Madrid (dulà ch’e partissarà ai 2 di Otubar dal 2019, tal cjadalan di Gandhi) e Madrid (dulà ch’e rivarà ai 8 di Març dal 2020, te “Zornade interazionâl des feminis”). L’organizazion e sarà curade dal Comitât pâs, coabitazion e solidaritât “Danilo Dolci” e di “Mondosenzaguerre”.