Friûl.net

Cui ch’al vûl cognossi i plui antîcs abitatôrs des grotis dal Friûl al varà di lâ sù sul cjiscjel di Udin par visitâ la mostre “Antichi abitatori delle grotte in Friuli”, inmaneade de Sezion archeologiche dai “Civici Musei”. L’esposizion e restarà vierte fintremai ai 27 di Fevrâr dal 2022. Oraris: miercus e joibe, 15-18; vinars 15-19. Prenotazion obligatorie (0432 1272591).

Ogni vinars, la Fondazion Acuilee e organize visitis guidadis li de Domus di Tito Macro, a 14.30. I visitadôrs, cun prenotazion obligatorie (320 0342258), a saran compagnâts dal archeolic Cristiano Tiussi, diretôr de instituzion regjonâl. La vile (datade fra I secul prin di Crist e I secul dopo di Crist) e je une des plui grandis fra chês de Ete romane da l’Italie dal Nort. I apontaments programâts a colin ai 5, ai 12, ai 19 e ai 26 di Març.

Ancje vinars ai 5 e ai 12 di Març, si podarà visitâ la mostre fotografiche “L’isola della Salvezza” compagnâts dal autôr des oparis esponudis, Francesco Comello. L’iniziative dal “Craf” e je inmaneade li dal Museu civic d’art di Pordenon. Apontament par 5 personis par volte, cun prenotazion obligatorie, a 15, a 16 e a 17 (0427 91453).

E à tornât a viergi la mostre “Tiliment, il Fiume si racconta”, imbastide dal Ecomuseu des Aghis (www.ecomuseodelleacque.it) e dal “CeVi”, li dal cjistiel Saorgnan di Dartigne. Lis fotos e i videus di Eugenio Novajra si podarà rimirâju, daûr prenotazion telefoniche (338 7187227), dome joibe e vinars.

Di chê strade de mostre “Vienna 1900. Grafica e design”, i Museus provinciâi di Gurize a tornin a proponi une cjalade su la produzion grafiche de “Secession” di Viene e sore il dut su la contribuzion ufierte al moviment artistic che si è svilupât a cjaval fra Votcent e Nûfcent di Josef Maria Auchentaller, ch’al sielgè come Patrie da l’anime Grau. Oraris: martars-domenie, 10-18, fintremai ai 28 di Avrîl.