Friûl.net

Midiant dal “Annuario dell’Agricoltura italiana 2019”, il Consei pe ricercje in agricolture e pe analisi da l’Economie agrarie al à tamesât fûr par fûr ancje l’agricolture furlane. Cun Trentin, Süd Tirol e Venit, il Friûl (-3%) e je la regjon dulà che, vie pal 2019, il valôr de produzion agricule al è calât di plui. Al è un dai dâts plui preocupants proferîts tal studi, presentât ai 22 di Zenâr, intune cui dâts dal marcjât fondiari. Al cale ancje dal 8,2% il numar dai operadôrs de Agricolture biologiche; a cressin, impen, i operadôrs de Agricolture sociâl. Il scandai al pues jessi let, tal lûc internet dal “Crea”.

Sconzurât il risc che il guvier al puedi impugnâle, la Leç regjonâl 21/2020 su lis grandis derivazions idroeletrichis, par deventâ pardabon operative, e scuen jessi compagnade dai proviodiments atuatîfs. Par chel, la Zonte e scuen daurman scoltâ i Cumons, lis Comunitâts montanis e i beneficiaris ch’a spietin di ricevi energjie eletriche a gratis o compensazions adatadis. I conseîrs Cristian Sergo (“M5S”) e Nicola Conficoni (“Pd”) a ricuardin che la Zonte e à timp fint ai 10 di Fevrâr par fâ la part dal so dovê.

L’Empori solidari di Glemone, “Di man in man”, lunis ai 11 di Genâr, al torne a viergi daspò dai mês de emergjence sanitarie. Ma al à bisugne streme di jutoris, pal fat che si è svuedât, in chescj dîs, par socori lis vitimis dal taramot dai 29 di Decembar in Cravuazie, spedint sore il dut munturis pal Invier. I ambients de “Cjase dal Piligrin” di strade Sant’Antoni a saran vierts lunis e sabide, di 9.30 a misdì, e miercus, di 14 a 17. Lis volontariis a domandin ch’a sedin puartadis dome vistîts e scarpis di sest e daûr de stagjon. Par domandâ robe si scuen prenotâsi par telefon (353 4099610 o 340 614598, intant dai oraris dal Empori).