Friûl.net

Di chê strade de “Zornade de Memorie”, ch’e cole ai 27 di Genâr, la clape “Apertamente” e organize, cun “èStoria”, “Coop 3.0”, “Kulturni dom” e “Collettivo Terzo Teatro” di Gurize, un’ocasion di riflession tal so lûc internet e par “Facebook”. La convigne e tacarà a 18. A saran presentâts un filmât sul cjamp di concentrament di “San Sabe”, lis leturis scenichis “Savina - storia di una madre triestina deportata nei lager nazisti” e “La Notte” di Eli Wiesel e une scolte di cjantis ebraichis par cure de corâl “Audite Juvenes”.

Cuntune cuote di 25 euros (soci ordenari) o di 10 euros (soci student), si pues dâsi in note par dutelan al Institût furlan pe Storie dal Moviment di Liberazion (“Ifsml”).

Il “Lunari da Dalbide” pal 2021 al è dedicât a l’Onorande Compagnie dai Cantôrs de Plêf di San Martin di Çurçuvint. Su l’antighe corâl, inviade 250 agns indaûr, al à studiât Luca Boschetti. Dutune cul lunari, al sarà dat fûr, tanche “Sop”, il videu “L’antica rogazione di Gorto a Cercivento” di Christiane Rorato (http://christianerorato.fr).