Friûl.net

Tal lûc www.dati.friuliveneziagiulia.it/Ambiente/Censimento-dei-siti-inquinati/bfhq-znvn, si pues scrutinâ il “Censiment dai sîts incuinâts” dal Friûl e de provincie di Triest. La documentazion, inzornade fint ai 10 di Genâr dal 2020, e je curade de Direzion regjonâl Ambient e Energjie.

Ancje il Friûl al à cjapât part a la manifestazion “La protesta dei pesci di fiume”, inmaneade di un trop di clapis pe protezion de nature par domandâ che l’Italie e meti in vore pardabon la “Diretive Cuadri Aghis”, ancje cuanche si trate di energjie idroeletriche, e par ch’a cessin i finanziaments publics pai implants idroeletrics ch’a pratindin di fiscâ aghis ancjemò naturâls. Paisans e ambientaliscj, ai 25 di Genâr, a àn organizât “sit-in” e “flash mob” di proteste a Plodn/Sapade (“Commissione Tutela Ambiente Montano” dal “Cai”, Comitât “Pas Carnia Cadore”, “Legambiente); a Savogne (“Amici del torrente Alberone”); a Flavuigne (“Movimento Tutela Arzino”); a Vît (“Legambiente” di Pinçan); a Trasaghis (“Legambiente Pedemontana Gemonese” e Comitâts locâi “Difesa acque”); a Resie (Comitât “No Centralina Ponte Rop”); a Dasaiis di Prât (Comitât “Salviamo la Fuina”); a Soclêf (“Legambiente Carnia” e “Comitato Tutela Bacino Montano del Tagliamento”); a Paulâr (“Comitato contro centralina Rio Pecol”); a For Disot (Comitât “Pas - Per Altre Strade”); a Stracis di Gurize (“Comitati Salviamo l’Isonzo” e “Legambiente Gorizia”); a Çurçuvint (“Beni collettivi Carnia”).

In face dal disastri de Autralie, des montanis da l’Indonesie e dai 20° di cjalt dal Invier de Norvegje..., no si pues fâ fente che il mont nol sedi daûr a colâ intune vuate cence confins. L’ultin chivalì su la crise climatiche lu à ripetût “Fridays for future Italia” (#fridaysforfuture) e si pues leilu tal lûc internet di “Comune.Info”. «Di fronte a tutto questo, la politica non muove un dito. Noi però non resteremo a guardare mentre il nostro futuro va in fiamme!» – a scrivin i zovins –. Ai 24 di Avrîl (#24Aprile), «parteciperemo al quinto Sciopero globale per il clima, manifestando in oltre cento città italiane e coinvolgendo miliardi di persone in tutto il mondo, decise a difendere il futuro loro e delle generazioni a venire».