Friûl.net

Ancje lis “Concessions di derivazion” domandadis prin de aprovazion dal “Plan regjonâl di tutele des aghis” a scuegnin rispietâ i limits previodûts tal articul 43 des normis di atuazion di chel Plan. Lu à stabilît la Cort constituzionâl che, ai 21 di Jugn, e à depositât la sô sentence su la constituzionalitât de «no aplicabilitât» che la Regjon e varès volût concedi mediant dal articul 7 de leç 12/2018. Il Consei dai ministris al veve scugnût oponisi, domandant une verifiche di legitimitât. Come ch’e à confermât in plen la Cort constituzionâl, «la norma regionale è ritenuta in contrasto con le “disposizioni statali ed europee in materia di tutela quantitativa delle acque, con conseguenze altresì sulla tutela qualitativa dei corpi idrici”», ancje pal fat che la protezion des aghis e jentre te materie de protezion dal ambient, dulà che lis normis regjonâls no puedin «derogare alle leggi statali applicabili in questo ambito». La sentence cuintri dal “regâl” che la Regjon e veve argagnât pe “Lobby” dai “Derivatôrs privâts” e je la numar 153 dai 7 di Mai dal 2019.

Katarina Žakelj, diretore di “Cipra Slovenie”, e je intervignude su la cuistion «Cui sono i vêrs “Vuardeans dal Paisaç”?». Par Špela Berlot, a son la int ch’a son a stâ sul teritori e che, justeapont par chel, si scuen coinvolziju intai procès decisionâi e di svilup. Agricolture, turisim, stradis di comunicazion e produzion di energje eletriche, cu lis sôs infrastruturis, a son daûr a fiscâ il paisaç, biel che lis instituzions ur rispuindin ai problems cence ambizions e cence coordenament. Par chel, seont Žakelj, a coventin principis vincolants par incorazî lis personis a vê une relazion sustignibil e rispietose cul paisaç, cemût ch’al sugerìs il proget “Ground for Landscape Policy”.

“Legambiente” e à butât fûr l’edizion pal 2019 di “Ecomafia. Le storie e i numeri della criminalità ambientale in Italia”, il scandai su la criminalitât ambientâl in Italie. Numars e cifaris dai delits cuintri de nature e dal ambient si podarà burîju fûr e profondîju su la rêt des rêts, a lis direzions: https://cms.legambientefvg.it/temi/altro/2074-ecomafia-2019-le-storie-e-i-numeri-della-criminalità-ambientale-in-italia.html e http://noecomafia.it/. La provincie di Udin, cun 30, e chê di Gurize, cun 21 infrazions aciertadis, a spichin te classifiche furlane de ilegalitât tal cicli de scovacis, dulà che la provincie di Pordenon si ferme a 7 infrazions. Par chel che s’inten al ram ilegâl dal ciment, lis infrazions aciertadis a son 25 te provincie di Udin, 23 in chê di Pordenon e 9 in chê di Gurize. Il scandai al profondìs ancje i setôrs dal agroalimentâr, de archeomafie, dal trafic di animâi, dai fûcs e des energjis rinovabils.

A cheste direzion, https://cms.legambientefvg.it/index.php?option=com_attachments&task=download&id=1511, su la rêt des rêts, si pues lei l’esit dai scandais che “Goletta Verde” di “Legambiente” e à fat su la marine dal Friûl e di Triest. Seont “Maremonstrum”, magari cussì no, si registre 2,8 criminâi ogni chilometri di cueste.