Friûl.net

Il “Centro Diritti Umani” de Universitât di Padue al à publicât l’edizion 2019 dal “Annuario italiano dei diritti umani”. La version digitâl “open access” si cjatile a lis direzions http://bit.ly/annuariodirittiumani2019 e http://unipd-centrodirittiumani.it/public/docs/Annuario2019.pdf. La version stampade e coste 15 euros.

Joibe ai 17 di Otubar, a 20.45 li dal teatri “Benois” di Codroip, e je programade la prime serade sul ambient e sul avignî par cure dal Circul di “Legambiente”. Si proietarà il documentari “Il sottile velo azzurro” di Marco Virgili e di Ivo Pecile sui mudaments climatics in Friûl. La seconde “Joibe for Future” e colarà joibe ai 24 di Otubar, cuanche si fevelarà di plastiche.

Dai 26 di Otubar ai 4 di Avrîl dal 2020, e torne la rassegne “Teatro Contatto”, dedicade dal “Css” pe XXXVIII volte a la gnove scene contemporanie. A saran inmaneadis 20 propuestis artistichis par 56 seradis. Il program si pues burîlu fûr su la rêt des rêts.

Il Cine Splendor di San Denêl al à butât fûr il lunari dai siei apontaments dal mês di Otubar, ch’al è il prin de gnove seson, curade di “Officine d’Autore”. I apontaments a colaran di sabide a 21 e di domenie a 16.30, cun proiezions speciâls par “MontagnaCinema”, lunis ai 14 e ai 28 di Otubar (www.montagnacinema.it); e martars ai 22, cun “Rosa” di Katja Colja, e martars ai 29, cun “Essere Leonardo da Vinci”.

Il Cumon di Majan, cul jutori de Comunitât colinâr e dal “Ecomuseu des Aghis” dal Glemonat, al organize une schirie di convignis e di escursions dedicadis al Tiliment. L’iniziative “Conosciamo il Tagliamento” e tacarà joibe ai 10 di Otubar, a 20.30 li dal municipi. Al intervegnarà Maurizio Tondolo che, dopo di vê tratât la cuistion “Morfologia del territorio di Majano”, al guidarà la visite dai 12 di Otubar (a 15) par cognossi “Il Campo di Osoppo-Gemona visto dal Forte di Osoppo”. Altris doi apontaments a colaran ai 24 di Otubar (“Il fiume Tagliamento”, par cure di Daniele Tenze) e ai 26 di Otubar (escursion a Ciman, par cognossi “Il fiume Tagliamento visto dall’alveo). Par informazions: 0432 959078.

“La Nostra Famiglia” e il Cumon di Pasian di Prât a promovin la rassegne cinematografiche su la disabilitât “Effetti Speciali”. Lis proiezions a tacaran a 20.30, li de sale parochiâl “San Giacomo” di Pasian di Prât. Ai 14 di Otubar, al sarà proponût “Non ci resta che vincere”; ai 21, “Solo cose belle”; e ai 28, “Cafarnao caos e miracoli”.

Dai 13 ai 19 di Otubar, e cole la Setemane taliane de Protezion civîl. Di chê strade, ancje la Sorintindince regjonâl e à stabilît d’inmaneâ une schirie d’iniziativis, publicadis tal lûc internet www.sabap.fvg.beniculturali.it. Ai 17 e ai 18 di Otubar, li dal palaç di strade Zanon, al sarà proponût un lavoratori par fruts dai 6 ai 14 agns e dai 10 ai 15 agn sul intervent te glesie di San Zuan di Glemone par salvâ il sufit cu lis oparis di Pomponio Amalteo, daspò dal taramot dal 1976.

Par Pasche Tafanie, ai 6 di Genâr dal 2019, a rivaran in Friûl ducj i munics benedetins de “Congregação benedectina do Brasil” che il vescul di Gurize ur à dât l’incarghe di tignî cont dal santuari di Barbane e di ufrîur la curie pastorâl ai piligrins ch’a visitin l’isule mariane te Lagune di Grau. I Benedetins ur daran la volte ai fraris francescans, in servizi a Barbane dal 1901.

«E je ore di sielgi de ce bande stâ»: par cheste reson, ancje in Friûl, e je daûr a slargjâsi la rêt «#Ioaccolgo», «par dî di no a l’asse e a l’esclusion e par dî di sì al biel acet, a la solidaritât e a la paritât». I obietîfs di «#Ioaccolgo» a son 8: Solidaritât fra i Paîs d’Europe pal biel acet; Puarts vierts par salvâ la vite des personis; Coredôrs umanitaris par contrastâ la criminalitât organizade; Biel acet slargjât par un’inclusion positive; Derit dal asîl (articul 8 de Constituzion) e abolizion dai “Decrets sigurece”; Lote cuintri di asse, razisim e xenofobie; Ricognossiment dal “Ius soli”; Politichis di cooperazion pal svilup, pe pâs e pai derits dal om.

Il film sui mudaments climatics “Una scomoda verità 2”, joibe ai 3 di Otubar, al scree a Tumieç, li dal Cine “David” a 20.30, la rassegne cinematografiche “Immagini e storie della società”. Lis proiezions a laran indevant fintremai ai 19 di Decembar, ogni joibe, coordenadis dal Cumon.