Friûl.net

No cessin i riviei li dal “Cpr” di Gradiscje Imperiâl. “Assemblea no CPR no frontiere” e continue a denunciâ la situazion, publicant comunicâts e videus. «Le condizioni di vita dentro sono pesantissime (…) – a scrivin i difensôrs dai «internati» –; la rabbia dopo la morte di Orgest Turia si intreccia alla paura di morire nello stesso modo». Documentazion su la situazion dal Centri e je popolarizzare a lis direzions: https://nofrontierefvg.noblogs.org/post/2020/07/30/deportazioni-dal-cpr-e-nuovi-video-da-dentro-aggiornamenti-del-30-07-2020/ - https://nofrontierefvg.noblogs.org/post/2020/07/31/z-che-non-si-alza-dal-letto-da-ottanta-giorni/.

Si podarà segnalâ fintremai ai 2 di Setembar i candidâts pal premi “Jean Jono - L’uomo che piantava gli alberi”, che “Veneto Agricoltura” al à inmaneât par onorâ i merts di chei ch’a operin par promovi e par valorizâ, mediant di boscs gnûfs, l’ambient e il paisaç talian. Il premi al sarà assegnât intant de “Fiera & Festival delle Foreste”, programât a Longaron dai 11 ai 20 di Setembar. La schede pes candidaduris, discjamade de rêt des rêts, e larà spedide par pueste eletroniche.

Ai 2 di Avost al cole il DCLXXXII innovâl da la dedicazion dal dom di Sant Andree di Vençon, par man dal sant patriarcje Beltram. Ai 6 di Avost dal 1995, juste 25 agns indaûr, chel istès templi al vignive tornât a la Plêf di Vençon, daspò de riconstruzion dai taramots dal 1976. Di chê strade, la clape “Amici di Venzone” e à publicât un’edizion gnove de “Guida del Duomo”, in convigne cu la Parochie.

Dai 4 di Avost ai 6 di Setembar, la clape culturâl “Colonos” e torne a proponi a Vilecjasse di Listize la sô rassegne “Avostanis”. Chest an, e varà par titul: “Doman... no è una peraula”. La jentrade par ducj i apontaments e sarà libare, ma e coventarà la prenotazion “on line”, cun “Eventbrite” (https://colonos.eventbrite.it). Il program complet de rassegne si cjatilu tal lûc internet de socie.

Cundut che la pandemie i à permetût a l’umanitât di vuadagnâ 3 setemanis, a pet di an passât, la dì dal “Overshot day 2020” e je daûr a scivinâsi in mût spaurôs. Chest an, e varès di colâ ai 23 di Avost. In chê zornade, si varà finît di consumâ e di straçâ lis risorsis – al ven a stâi la «biocapacitât globâl» – che il Marimont al rive a garantî intun an intîr. E al cressarà ancjemò di plui il «debit public ecologjic» che economiscj, bancjîrs e sorestants di ogni fate no cjacarin mai e che no scombatin gran cu la sgrimie ch’e coventarès.

Lis fotografiis di Sandro Becchetti, scatadis a Pieri Pauli Pasolini e imbastidis te mostre “Pier Paolo Pasolini attraverso lo sguardo di Sandro Becchetti: frammenti di una narrazione”, si podarà rimirâlis fintremai ai 11 di Otubar, li dal “Centro Studi Pier Paolo Pasolini” di Cjasarse.

Dopo che la maiorance regjonâl e à trombonât in Consei la mozion ch’e domandave l’impegn de Regjon par otignî il ricognossiment dal Tiliment come “Patrimoni Unesco”, il “Patto per l’Autonomia” al à inmaneât une petizion, mediant “Change.org”, par domandâ l’impegn dai sorestants talians par che “Il re dei fiumi alpini sia patrimonio Unesco”. Si pues firmâ su la ret de rêts, a la direzion: www.change.org/p/sergio-costa-il-tagliamento-sia-patrimonio-mondiale-naturale-unesco.

I Yanomami dal Brasîl ur domandin solidaritât a dutis lis nazions dal mont par fermâ l’invasion de sô tiere. L’ultime iniziative inviade par otignî chest fin e je la campagne internazionâl “#ForaGarimpoForaCovid”, prudelade di “Survival International”. Tune petizion, si domande al guvier brasilian l’espulsion di 20 mil ciridôrs d’aur, ch’a son daûr a fiscâ lis tieris yanomami e a slargjâ la pandemie di “Coronavirus”.

Al 6 di Lui, al à vierzût ancje a Pordenon il “Sportello Energia”. Il servizi, curât di “Ape Fvg”, al ufrissarà a gratis, ogni lunis, consulence sui finanziaments a pro de eficience energjetiche. L’ufici al è logât li dal Cumon, te strade Bertossi 9, e si podarà prenotâsi telefonant al numar 353 41 04 289.

Il studi di Enrico Agostinis su l’antroponomastiche di Culine, publicât 20 agns indaûr tal volum “Le anime e le pietre”, al è a disposizion su la rêt des rêts, dulà ch’al pues jessi discjamât intal formât “Pdf”. Za fa 4 agns, Agostinis al veve proponût su la rêt ancje il studi “I luoghi e la memoria”, ch’al proferìs la toponomastiche de vile cjargnele (https://www.alteraltogorto.org/alto-gorto/collina/i-luoghi-e-la-memoria.html).