Friûl.net

Dai 5 di Març, par 6 mês adilunc, ogni citadin al podarà presentâ lis sôs osservazions scritis sul secont inzornament dal “Plan di gestion des aghis” e sul prin inzornament dal “Plan di gestion des montanis” dal Distret idrografic “Alps orientâls”, ch’al cjape dentri ancje la Patrie. I documents si pues tamesâju tal lûc internet dal Distret, dulà ch’al è proferît ancje il stamp pes osservazions (mediant dal leam “Presenta un’osservazione”).

Cui ch’al vûl cognossi i plui antîcs abitatôrs des grotis dal Friûl al varà di lâ sù sul cjiscjel di Udin par visitâ la mostre “Antichi abitatori delle grotte in Friuli”, inmaneade de Sezion archeologiche dai “Civici Musei”. L’esposizion e restarà vierte fintremai ai 27 di Fevrâr dal 2022. Oraris: miercus e joibe, 15-18; vinars 15-19. Prenotazion obligatorie (0432 1272591).

Ai 4 di Març, al cole l’innovâl de muart di Ippolito Nievo (1831-1861; www.friul.net/dizionario_biografico/index.php). La Biblioteche di Udin che, par volontât dai siei dissindints, e ten cont cetancj manuscrits dal inteletuâl garibaldin, e à publicât la note di ducj i tescj stampâts che si pues cjatâ li de instituzion culturâl furlane.

Ogni vinars, la Fondazion Acuilee e organize visitis guidadis li de Domus di Tito Macro, a 14.30. I visitadôrs, cun prenotazion obligatorie (320 0342258), a saran compagnâts dal archeolic Cristiano Tiussi, diretôr de instituzion regjonâl. La vile (datade fra I secul prin di Crist e I secul dopo di Crist) e je une des plui grandis fra chês de Ete romane da l’Italie dal Nort. I apontaments programâts a colin ai 5, ai 12, ai 19 e ai 26 di Març.

Ce pensino la int de ricolte disferenceade des scovacis? Funzionie? Puedie jessi miorade? Lis Impresis regjonâls impegnadis in chest setôr, cul jutori de Regjon e di “Arpa”, a proponin un cuistionari “on line” par domandâ il parê dai citadins, compagnât cul sproc: «Le buone idee non si buttano / Diventa protagonista della sostenibilità ambientale». Il leam par rispuindi al è: https://survey.zohopublic.eu/zs/OchgZq.

Vie pal mês di Març, la Fondazion “Bambini e Autismo” e propon l’apontament solidari “Marcia in Blu” (#marciainblu2021) par sensibilizâ lis Comunitâts dal Friûl ocidentâl sul autisim, un disturp che i tocje a un frut ogni 77. Si varà di cori o di cjaminâ, di bessôi o in companie, vistîts cun alc di blu, comunicant par “Wa”, al numar 349 7440779, non, Cumon e chilometris percorûts. Ai 2 di Avrîl, cuanch’e colarà la “Zornade mondiâl dal autisim”, i risultâts de marcje a saran comunicâts li dal municipi di Pordenon.

Ancje vinars ai 5 e ai 12 di Març, si podarà visitâ la mostre fotografiche “L’isola della Salvezza” compagnâts dal autôr des oparis esponudis, Francesco Comello. L’iniziative dal “Craf” e je inmaneade li dal Museu civic d’art di Pordenon. Apontament par 5 personis par volte, cun prenotazion obligatorie, a 15, a 16 e a 17 (0427 91453).

Al à tornât a partî il concors “ClimArte”, par cure di “Fridays For Future Carnia”. Tal lûc internet https://fridaysforfuturefvg.it/carnia/climarte-una-mostra-a-tema-cambiamento-climatico-a-tolmezzo/, si cjate regolament e schede di partecipazion, seont la modalitât digjitâl gnove causionade de pandemie. Tal mês di Mai cu ven, al sarà inmaneât un “virtual tour online” e, salacor, ancje une mostre, se l’emergjence e sarà sot control.

E à tornât a viergi la mostre “Tiliment, il Fiume si racconta”, imbastide dal Ecomuseu des Aghis (www.ecomuseodelleacque.it) e dal “CeVi”, li dal cjistiel Saorgnan di Dartigne. Lis fotos e i videus di Eugenio Novajra si podarà rimirâju, daûr prenotazion telefoniche (338 7187227), dome joibe e vinars.

La storie dal cjamp di concentrament fassist di Visc, in gracie di Ferruccio Tassin, di Claudio Simeon e di Laurin Zuan Nardin, no sarà dismenteade gran. La presentazion dal lûc d’internament, destinât dal mês di Fevrâr al mês di Setembar dal 1943 massimementri al torment dai perseguitâts civîi di divignince cravuate e slovene, tal lûc internet campoconcentramentovisco.altervista.org, di cualchi setemane e je proferide ancje te version par furlan, cul titul “Il cjamp di concentrament di Visc: une storie dismenteade”.