Friûl.net

Lunis ai 24 di Fevrâr, si presente a Udin, a 20 li de Comunitât di San Domeni, tal viâl Resistencia, il spetacul: “Nelle mani degli Dei. L’odissea di un bimbo invisibile”. La rapresentazion e intint di dismovi l’atenzion sui efiets des normis dal 2009 ch’a stabilissin ch’al covente presentât un “Permesso di soggiorno” par podê declarâ la nassite di un fi.

Il Dipartiment di Sciencis economichis e statistichis de Universitât furlane, cul jutori de societât ch’e gjestìs il servizi idric integrât tal Friûl orientâl, Irisacqua srl, al à prontât un scandai par verificâ lis preferencis dai citadins dal Friûl e di Triest sul servizi idric. Ateneu e “Questlab”, par ticiâ la partecipazion, s’impegnin a prudelâ un proget dal “CeVi” pe realizazion di une cjisterne tal Sud dal mont, daûr dal numar di cuistionaris compilâts su la rêt des rêts.

Dai 20 di Fevrâr, Loris Basso, ministradôr d’impresis dal “Tierç Setôr” e, za timp, sindic di Cuar di Rosacis, al è il president gnûf dal “Ent Friûl pal Mont”. I darà la volte a Adriano Luci. La samblee dai socis, ch’e à fat bogns i belançs e ratificât la constituzion dal “Circul Furlan di Santa Catarina”, in Brasîl, e à votât ancje il gnûf Consei diretîf. A son stâts elezûts: Michelangelo Agrusti, Flavia Brunetto, Pierino Chiandussi, Anna Pia De Luca, Elisabetta Feresin, Pietro Fontanini, Stefano Lovison, Luigi Papais, Federico Vicario, Christian Vida, Dario Zampa, Gabrio Piemonte, Francesco Pittoni e Joe Toso.

E restarà vierte fintremai ai 22 di Avrîl, li dal Museu des Arts popolârs di Tumieç, la mostre fotografiche “Sculture di len baroche di Scuele todescje in Cjargne e Val Cjanâl. Contribuzions gnovis”. Si podarà visitâ l’esposizion, curade di Giuseppina Perusini, seont chescj oraris: martars, joibe e vinars, 9-13 / 15-17; miercus 9-13; sabide e domenie, 10-13 / 15-17. La scree e je stabilide sabide ai 22 di Fevrâr, a 17.30.

«Cari sindaci, vi ringraziamo per il nostro cemento quotidiano»: cun chest sproc, “Teo131” al compagne il so concors «par grops di zovins creatîfs, atents a la realtât dulà ch’a vivin». Dal I ai 30 di Jugn, i grops interessâts a podaran consegnâ lis sôs oparis artistichis pal scrutini dal zurì indipendent. Il regolament al è publicâst tai lûcs internet dal Cumon di Fontanefrede (www.comune.fontanafredda.pn.it) e dal Circul Verdi (www.circoloverdi.it). I vincidôrs a saran proclamâts intant di une serade, ai 15 di Novembar.

La “Buteghe dal Mont” di Glemone ancje chest an e organize une “Cene etniche”. Ai 29 di Fevrâr, e sarà dedicade al Kurdistan irachen. Il viaç fra savôrs e storiis di chê regjon dal mont al sarà guidât des contis filmadis di Massimo Mucchiut de clape “Primi Piani” (www.primipiani.org), a 20 li dal Centri parochiâl di Salcons. La cuote di 25 euros e coventarà par judâ la “Staffetta Sanitaria per il Rojava”, ch’e prudele la “Mezza Luna Rossa Kurdistan Italia”. Si scuen prenotâsi dentri dai 25 di Fevrâr (340 2837498 / 0432 981314 / Fb Bottegadelmondo Gemona). La Buteghe e je vierte te place dal municipi, vinars (10-12) e sabide e domenie (10-12 / 15-19).

Al è nassût un “blog” gnûf ch’al fronte lis cuistions regjonâls e ch’al smire di jessi «cualificât, positîf e laic (al ven a stâi apartitic, no inschiriât e nancje partesan)». Tal proget batiât “Rilancia Friuli” (https://www.facebook.com/rilanciafriuli/), a son ingaiâts: l’economist Fulvio Mattioni, il zornalist Giuseppe Liani, il sociolic Bruno Tellia, il sindicalist Roberto Muradore, il fisic Furio Petrossi e il furlanist Ubaldo Muzzatti.

Students universitaris, dotôrs frescs di laureade e students dai ultins doi agns de Scuele superiôr a puedin cjapâ part al “Premio Iai”, inmaneât dal “Istituto Affari Internazionali” par saçs curts e “video-clip” ch’a frontin la cuistion: “Il pianeta, l’Europa e io: come contrastare i cambiamenti climatici, assicurare un modello di sviluppo sostenibile e tutelare l’ambiente?”. Il regolament dal concors al è publicât tal lûc internet https://bit.ly/3848IVU. Si varà timp par concori fintremai ai 5 di Avrîl.

Dai 8 di Fevrâr ai 8 di Març, li dal Centri studi “Pier Paolo Pasolini” di Cjasarse, si podarà visitâ la mostre “Mario Micossi: jù pai ciamps di Versuta. Incisioni, graffiti e disegni sui luoghi di Pasolini”. E sarà screade sabide 8, a 17.30 par memoreâ il LXXV innovâl de “Academiuta di lenga furlana” che, tal indoman de seconde vuere mondiâl, parie cun “Risultive” di pre’ Bepo Marchet, e à tornât a fâ nassi lis Letaris furlanis. Oraris: lunis-vinars, 15-19; sabide e dîs di fieste, 10.30-12.30 / 15-19.

La Biblioteche di Udin e à prontât la riproduzion digitâl dal “Catastic”, dai “Annales” e dai “Acta” dal “Archîf Comunâl Antîc” di Udin. Ducj i 15 volum si pues consultâju “on line”. Si trate des deliberazions dal Consei di Udin, dal 1345 al 1819, e des deliberazions dai Deputâts de Citât dal 1490 al 1799. Daprûf dal proget, al à lavorât ancje il Dipartiment di Studis Umanistics e dal Patrimoni culturâl de Universitât.