Friûl.net

A varan timp fintremai ai 31 di Decembar i zovins dai Cumons di Vençon, Resie, Resiute, Mueç, Glemone, Dartigne, Montenârs, Lusevare, Taipane, Dogne e Scluse par candidâsi pe Consulte da la zoventût de “Risierve di Biosfere MaB Unesco Alps Juliis dal Friûl”. A puedin dâsi in note zovins dai 16 ai 30 agns. Il modul al va consegnât li dai uficis dal Parc des Prealps Juliis, a Resie (place del Tiglio 3).

Miercus ai 11 di Decembar, la clape “Carnia Cultura” e organize a Tumieç une convigne cun Maria Nives Granzotti par cjacarâ su “Come prepararsi all’inverno con l’ausilio dei rimedi naturali”. La riunion e tacarà a 18, li di palaç Frisacco.

Il Museu dal Teritori di San Denêl al presente, insin ai 12 di Genâr dal 2020, la rassegne di preseps “Natività: dalla Tradizione… all’Arte”. Oraris: vinars, 9.30-12.30; sabide, domenie e dîs di vore, 10-12.30 / 14.30-18.

Dai 2 ai 13 di Decembar, e cole a Madrid la XXV convigne des parts su la clime, “Cop 25”. Inmaneade des Nazions unidis, la convigne e je l’apontament mondiâl plui impuartant par frontâ la lote cuintri dai mudaments climatics. Di cuanch’al è stât fat bon il “Compatât di Kyoto”, intant di “Cop 3”, vie pal 1997, l’umanitât e cîr di fermâ la distruzion dal ambient. Ma si spiete ancjemò che lis decisions cjapadis a Parîs dal 2015, intant di “Cop 21”, a deventin obligatoriis e che i Paîs che no lis rispietin a sedin multâts.

Miercus ai 11 di Decembar, a Trent, si discor di “Industrie idroeletriche e Autonomie tal Trentin”. La convigne, a 17.30 li de Biblioteche comunâl, e jentre te suage de rassegne “Vivi intune Regjon alpine”. A organizin l’Archîf dal “Csseo” cu la Fondazion “Museo storico del Trentino”, cun intervents di Tommaso Baldo e di Massimo Libardi.

Gianfranco D’Aronco, l’ultin protagonist de lote pe Regjon Friûl da la seconde metât dal Nûfcent, al è muart a 99 agns, ai 3 di Decembar. Cun Tessitori, Marchi, Marchetti, Pasolini e tancj altris partesans dal regjonalisim, al à scombatût a pro de Patrie cun gjenerositât e sapience strasordenariis. Il retôr de Universitât furlane, Roberto Pinton, al à interpretât il corot di ducj i furlans, chenti e ator pal mont, cun chestis peraulis: Gianfranco D’Aronco «al à garantît a la vite culturâl, politiche e instituzionâl dal Friûl une contribuzion grandone; al à stât un partesan ferbint de culture, de lenghe e de identitât furlane, intindudis come imprescj par viergisi fûr, par cressi e par confrontâsi cence mai sierâsi tal paisanisim. Al restarà par simpri te memorie dai furlans il puest ch’al à vût te propueste e te realizazion da l’Universitât furlane».

I litrats e i paisaçs di Giuseppe di Sopra (1882-1963), schedâts dal 1990 pal grop “Gli Ultimi” e pe Fototeche cjargnele, in gracie di Laura Matelda Puppini, si podarà viodiju tal lûc internet “Non solo Carnia”. Dutis lis fotografiis, scatadis a Rigulât e tai contors, a son ordenadis intun document, ch’al pues ancje jessi discjamât, a la direzion: www.nonsolocarnia.info/wordpress/wp-content/uploads/2019/11/foto-bepo-di-marc-.pdf. «Pongo qui queste preziose immagini – e scrîf Puppini – perché diventino bagaglio culturale comune, e fonte di arricchimento personale».

Cuntune schirie di convignis dedicadis a la “violence di gjenar” e torne la rassegne “Una vita spesa per la legalità” de clape “Per la Costituzione” di San Denêl. I apontaments, li dal auditorium “Alla Fratta” a 20.45, a colaran ai 29 di Novembar (cun Gessica Notaro e Giuseppe Losasso), ai 13 di Decembar (cun Paola Di Nicola), ai 24 di Genâr (cun Federica Angeli) e ai 7 di Fevrâr (cun Costanza Stoico, ch’e fevalarà di feminicidi).

Martars ai 26 di Novembar, si scree a Udin la mostre “In difesa dell’arte. Il diario di Carlo Someda De Marco (1940-1945)”. E je inmaneade de Universitât furlane cul Institût furlan pe storie dal moviment di liberazion, li de librarie “Friuli” di strade dai Rizzani 1. E restarà vierte, par cure dai students dal cors di “Museulogie”, fintremai ai 15 di Decembar, seont l’orari de librarie. A la presentazion, a intervegnaran a 17 Donata Levi e Martina Visentin dal Ateneu.

Par memoreâ il XX dal so innovâl, l’Institût regjonâl di promozion e di animazion culturâl “Irpac” al propon la mostre “...Tra vecchio e nuovo il Friuli si racconta”. E restarà imbastide fintremai ai 6 di Genâr dal 2020, li de glesie di San Francesc, a Udin. Oraris: martars-vinars, 15-18; sabide e domenie, 11-19. L’esposizion e il catalic a son par cure di Alvise Rampini.