Friûl.net

Vie pai mês di Avrîl, di Mai e di Jugn, la Mariplêf di San Pieri in Cjargne, e restarà vierte pe prejere e pes visitis di sabide e di domenie, tai oraris: 10-13 7 14.30-17.30.

Danilo De Marco, dai 19 ai 27 di Avrîl, al torne a presentâ la mostre “Negli occhi dei ribelli”, cui siei litrats fotografics in blanc e neri dedicâts ai partesans europeus. L’esposizion e sarà imbastide li dal Spazi espositîf “Make” di strade Manin 6/A, a Udin. Oraris: ai 20 e ai 23, 10.30-13 / 16.30-20; ai 24, 10.30-13 / 16.30-21.30; ai 25, 10-13; ai 25 e ai 26 di Avrîl, 16.30-20.

Al è viert il regolament par otignî un assegnât pe ricercje, li de Universitât furlane, te suage dal proget “Pachamama: protagonismo delle donne rurali per l’affermazione della sovranità alimentare in Bolivia”. Il scandai (marcât cu la sigle SSD: AGR/01 e coordenât di Luicia Piani) al sarà svilupât in colaborazion cu lis Universitâts San Simón di Cochabamba e San Andrès di La Paz e cu la clape “A Sud”. Il regolament al scjât ai 3 di Mai.

Fintremai ai 28 di Avrîl, i arlêfs de “Scuele Mosaiciscj dal Friûl” di Spilimberc a presentin la mostre “Icons of Art”. Li de Galarie “Harry Bertoia” di Pordenon, la rassegne e propon 35 litrats di “star” dal mont dal spetacul mondiâl.

La pene di muart e dinee il derit a la vite, no à rimiedi, e pues colpî ancje il nocent. Par chescj 3 motîfs, e tire adilunc la campagne di “Amnesty international” cuintri de pene di muart, ch’e conteste ancje il fat che, dulà ch’e ven aplicade, e à fat faliment tanche deterent de criminalitât ma e rapresente une forme di discriminazion e di repression cuintri dai puars e dai emargjinâts ch’a son lis primis vitimis dal so ûs sproporzionât (www.amnesty.it/rapporto-2018-pena-di-morte/?asset_code=39983&utm_source=DEM&utm_medium=DEM&utm_campaign=DEM5196). Chestis riflessions a vegnin profondidis tal scandai anuâl su la pene di muart, ch’al marche il fat positîf che, di 10 agn incà, il 2018 al è stât l’an cun mancul esecuzions.

Il fotograf Fausto Linda dal Circul fotografic “E. Battigelli”, dai 13 ai 28 di Avrîl, al propon la mostre “CitTown / Luce in città”, li dal Museu dal Teritori di San Denêl. L’esposizion e presente 40 fotografiis scatadis in citâts d’Europe e dal mont. Oraris: vinars, 9.30-12.30; sabide, domenie e dîs di fieste, 10-12.30 /14.30-18. La scree de mostre, sabide ai 13 di Avrîl a 19.

A la direzion https://goo.gl/forms/ZwAV2bxr2actWfcA3, miôr se dentri vinars ai 12 di Avrîl, si pues compilâ un cuistionari sul Proget “Non solo Pane”, ch’al smire di realizâ un “Distret di Economie Solidarie” tal teritori dal Friûl di Mieç. Il “Des” al sviluparà ce che si à za tacât a fâ cul Proget “Pan e Farine dal Friûl di Mieç”, invidant a messadâsi ducj ch’a tegnin cont dal teritori e des sôs Comunitâts e ch’a bramin di construî relazions fuartis e un’economie resilient. Par informazions: www.facebook.com/pg/PANeFARINE/posts/ e www.des-mediofriuli.it.

Tal lûc internet dal “Forum regjonâl dal Tierç setôr”, si pues lei ancje chest an il scandai su l’imprese sociâl, la cooperazion, il volontariât e lis clapis di promozion sociâl dal Friûl e di Triest. L’anuari, par cure di Paolo Tomasin e di Giorgio Volpe, al è saltât fûr in gracie dal jutori de Regjon e dal Centri servizis volontariât. “Rapporto 2018” al marche i “Cambiamenti in corso” (daspò de riforme legislastive dal 2017) e al propon, in 6 cjapitui, profondiments tematics su il Comitât di gestion dal “Csv”, su la partecipazion des femninis, su lis rêts associativis dal Tierç setôr, su lis societâts di socors mutuâl, sul “5 per mille” e su Tierç setôr e obietîfs pal svilup sustignibil dal “Onu”.

Il judizi dai Comitâts ch’a difindin il Lât di Cjavaç sul regolament prontât de Regjon pal “Concorso di idee mediante procedura aperta per l’acquisizione di una proposta ideativa finalizzata al recupero delle condizioni di naturalità del lago dei Tre Comuni” si pues leilu, fûr par fûr, tal lûc internet dal “Comitât pe autonomie e pe rivalutazion dal Friûl”. Il document, une vore critic, al è stât bielzà mandât a ducj i sorestants regjonâi, domandant di no pierdi l’ultime ocasion par salvâ il Lât e di no tradî la leç regjonâl 3/2018 e il “Plan di protezion des aghis”.

I Vescui dal Nordest, congregâts a Santa Giustina Bellunese, ai 8 e ai 9 di Avrîl, si son ocupâts di protezion de frutarie e des personis vunerabils, daspò dai scandui mondiâi su la pedofilie. Di chê strade, a àn nomenât il vescul di Adria-Rovigo, Pierantonio Pavanello, responsabil pal “Servizio regionale/interdiocesano per la tutela dei minori e delle persone vulnerabili”, e pre’ Gottfried Ugolini de Glesie di Bozen-Brixen, coordenatôr dal Servizi ch’al sarà componût di operatôrs pastorâi e di esperts e di un responsabil par ognidune des Glesiis furlanis, venitis, trentinis e sudtirolesis.