Friûl.net

Par cure dai Cumons di Cjarlins, di Gonârs, di Muçane, di Porpêt, di Prissinins e di San Zorç di Noiâr, al torne il concors leterari “Vôs de Basse”, cun 3 sezions: Narative (contis curtis, curts teatrâi o traduzions di contis curtis); Poesie (componiments poetics o traduzions di poesiis; Students (prose e poesie). Lis oparis a varan di rivâ li dal municipi di San Zorç dentri dai 28 di Decembar. Par informazions: 0432 620281.

Il “Nucleo Etico per la pratica clinica” e i grops di lavôr in Bioetiche de Aziende sanitarie numar 3 a proponin la rassegne cinematografiche “Visioni sulla vita”, cun 5 proiezions li dal “Cine Splendor” di San Denêl, a 20.30. Vinars ai 19 di Otubar pre’ Sergio De Cecco, Rosalia Sgubin e Giorgio Volpe a presentaran “P. S. I Love You” di Richard LaGravenese; vinars ai 26 di Otubar, al sarà proietât “Quel fantastico peggior anno della mia vita” di Alfonso Gomez-Rejon, cun presentazion di Franco Pertoldi, Miriam Masotti e Francesca Feruglio; vinars ai 9 di Novembar, serade cun Daniele Cipone, Manila De Marco e Idanna Pidutti par visionâ “Ella & John” di Paolo Virzì; vinars ai 16 di Novembar, l’apontament al sarà dedicât a “La famiglia Bérlier” di Eric Lertigau cun Bruno Sacher, Maria De Rosa e Flavia Nicoloso; miercus ai 21 di Novembar, la rassegne e finissarà cun “Foreverland” di Maxwell McGuire, presentât di Massimo Maschio, Massimo Don e Cristiano Padalino.

Li de glesie di San Francesc, a Udin, e tire adilunc la schirie di mostris fotografichis di “Irpac” su “Famee & Societât”, tal Friûl dai agns ch’a van dal 1950 al 1980. L’esposizion e restarà imbastide fintremai ai 25 di Novembar. Oraris: martars-vinars, 15-18; sabide e domenie, 11-19.

Li de “Cjase da Int”, fintremai ai 4 di Novembar, il Cumon di Çurçuvint al propon la mostre fotografiche “Tradizione Traduzione Tradimento / Riflessioni sull’architettura montana”. Oraris: 16-18, ducj i dîs de setemane, gjavât lunis. In mostre tescj di Giovanni Corbellini, Tommaso Ferrando, Luca Gibello, Marco Ragonese, Pietro Valle e progets di Dario Castellino, StudioErrante Architetture, Studioata, Bureau, Enrico Scaramellini, Buchner Bründler Architekten, Vudafieri e Saverino, Valerio Olgiati, Camillo Botticini, Daniele Marques e Bruno Zurkirchen, Francesco Collotti e Giacomo Pirazzoli, Baumschlager Eberle, Plasma Studio, Enrico Franzolini, Pedevilla Architects, Exit architetti associati, Elasticospa, Alessio Princic, Ceschia e Mentil, Geza, Ofis e Dekleva Gregorič.

La clape regjonâl dai Clubs dai alcoliscj in tratament “Arcat” (whatsapp 334 6627138) e propon, a Roncjis, dai 5 ai 10 di Novembar, un Cors di sensibilizazion sul mût ecologjic e sociâl di frontâ i problems leâts cul alcul “Metodologjie Hudolin”. Si varà di dâsi in note dentri dai 31 di Otubar.

Une convigne di monsignôr Luigi Bressan su “Religioni in Cina ed evangelizzazione. Il viaggio del beato Odorico da Pordenone”, ai 11 di Otubar, e à screât l’anade gnove de “Scuele catoliche di culture”. I “Percors” dai mês di Otubar e di Novembar a tacaran a 18, li dal Centri culturâl “Paulin di Acuilee” tal Borc di Trep di Udin, cul jutori dal “Moviment eclesiâl d’impegn culturâl” (udine.meic@gmail.com).

Al larà indevant fintremai ai 31 di Decembar dal 2019 l’An Sant Jubilâr de Badie di Nonantola. Il jubileu al intint di marcâ il recupar dal grant tesaur di religjon, di art e di storie emilian, regolât daspò dal taramot dal 2012. La Badie di Nonantola e je stade tirade sù di Anselm, sant langobart che, prin di bandonâ la vite politiche par dedicâsi a la vite religjose, al fo duche dal Friûl. Anselm al è onorât ancje de Glesie acuileiese, ch’e celebre la sô Memorie liturgjiche ai 13 di Fevrâr.

Ai 28 di Setembar, a tornin a començâ i cors di “Unisf 2018”, l’universitât di “savê fâ”, imbastide dal Circul pe legre diminuzion “Livence-Tiliment”. I apontaments de Sierade a colaran di vinars o di sabide, ai 28 di Setembar (menù vegan); ai 13 (“Compostaggio domestico”) e ai 27 di Otubar (borsis di tele); ai 9 e ai 10 di Novembar (machinis eletrichis); ai 23 di Novembar (pacuts par Nadâl); e il prin di Decembar (scarpets tirolês cu la gugje).

L’Institût furlan pe storie dal moviment di liberazion al propon la mostre “1942-43: la Storia che ci ri-guarda. Il dottor Mario Cordaro e gli artisti sloveni e croati nel campo di concentramento di Gonars”. E restarà imbastide fintremai ai 28 di Novembar, li di palaç Morpurgo, a Udin, te strade Savorgnane. Oraris: joibe e vinars, 15-19; sabide e domenie, 10-13 / 15-19. Par prenotâ visitis guidadis: 0432 295475 o archivio@ifsml.it. Inaugurazion, vinars ai 28 di Setembar, a 18.

Vie pal 2019, si votarà pal gnûf Parlament european. Par marcâ e popolarizâ l’impuartance dal apontament, la Samblee di Strasburc e à inmaneât une “community”, batiade «Cheste volte, jo o voti». Cui che si darà in note su la rêt des rêts al podarà cjapâ part a l’ativitât di promozion dal vôt e al sarà visât di iniziativis e programs.