1 | 2 | 3 | 4 | 5 | 6 | 7 |

[CULTURE]

I contadins, sabide ai 28 di Genâr, a contestaran il mont de culture che nol fâs nuie par difindi i bens coletîfs, menaçâts di un continui di progets energetics e d’infrastuturis tecnologichis. La proteste, a Percût, di chê strade dal “Premi Nonino”, e sarà organizade dal “Comitât pe vite dal Friûl rurâl” di 10.30 a 12.30. Tal volantin ch’al vegnarà dât fûr si lei: « La Costituzione tutela il paesaggio e il patrimonio storico ed artistico, come obbligo morale verso le generazioni future. Qui, invece, si assiste alla devastazione del territorio e, in mezzo al silenzio servile del burocrate e dell’ambientalista di servizio, alle reticenze dei mezzi d’informazione e all’ignavia del mondo accademico, le sorti della nostra terra restano affidate al coraggio di un pugno di contadini».

[POLITICHE]

Par cure de organizazion internazionâl “Vision of Humanity” e dal sfuei “The Economist”, al è saltât fûr il scandai “Democracy Index 2011”. Il document al pues jessi discjamât dal lûc internet www.visionofhumanity.org/info-center/2011-democracy-index/. A risultin dal scandai 25 democraziis plenis (il 15% dai Paîs cul 11,3% de int); 53 democraziis difietosis (31,7% - 37,1%); 37 regims ibrits (22,2% - 14%); e 52 regims autoritaris o ditaturis (31,1% - 37,6%). Te classifiche, l’Italie e jentre fra lis “Flawed democracies”, al ven a stâi fra lis democraziis difietosis, daspò di Cape Verde, Portugal, Sud Afriche, France e Slovenie. I prins trê Paîs de classifiche, fra lis democraziis plenis, Irlande, Austrie e Germanie.

[INFORMAZION]

Par cure dal “Centro di documentazione ebraica contemporanea” (“Cdec”), su la rêt des rêts, si pues tamesâ la note dai 7 mil e dusinte ebreus talians depuartâts dai nazifassiscj fra 1943 e 1945. Fra di lôr, a son ancje i nons di chel miâr di perseguitâts ch’a rivarin a salvâsi. Il lûc internet al fâs “pendant” cul volum “Libro della Memoria” di Liliana Picciotto e dute la documentazion ch’al presente e sarà consegnade uficialmentri ancje li dal Centri israelian de “Shoah” par svilupâ parie il “Database of the Shoah Names Victims” dal sît www.yadvashem.org.

[CORS]

Sabide ai 28 di Genâr, si presente a Udin il cors “Solidarietà per azioni”. La riunion e tacarà a 20.30, li des muiniis Rosarie (viâle delle Ferriere 19). Lis lezions publichis a frontaran chestis cuistions: “Etiche e culumie” (ai 3 di Fevrâr, a 20.30, cun pre’ Giuseppe Stoppiglia); “Justizie e relazions economichis internazionâls” (ai 10 di Fevrâr, cun Benedetto Gui); “Perspetivis par une economie disferente (ai 17 di Fevrâr, cun Francesco Marangon, pre’ Rinaldo Fabris e Anna Fasano).

[CULTURE]

La clape culturâl “Mitteleuropa” e fâs la sô samblee anuâl. E començarà sabide ai 28 di Genâr a 17, li de Glesie di San Roc di Gurize. Si resonarà su lis ativitâts sociâls di an passât e dal an gnûf.

[CULTURE]

La clape dai “Amici di Venzone”, sabide ai 28 di Genâr, e clame adun la samblee ordenarie par discuti su la relazion dal president e par resonâ sui belançs. Daspò di vê proponût il program pal 2012, si votarà ancje par rinovâ i sorestants de clape. La riunion e tacarà a 15, daprûf de canoniche di Vençon, li de “Sale Beltram”.

[MUSICHE]

“Resistencis in pentagramma” al è il titul de conference-conciert di Giovanna Marini, programade dai “Colonos” di Vilecjace di Lestize, sabide ai 28 di Genâr, a 20.30, par “In file” 2012.

[MUSICHE]

La rassegne “Angolo Club”, sabide ai 28 di Genâr, e presente (a 18.30 li de buteghe “Angolo della musica” di Udin, te strade Aquileia) il conciert “Acustikè” di Lorena Favot e di Gaetano Valli. La manifestazion e larà indevant sabide ai 11 di Fevrâr cul “Cimenti Matteo Quartet”, ch’al presente “L’orizzonte degli eventi”, e sabide ai 25 di Fevrâr, cul “Tryo Yerba”.

[CONCORS]

E je partide la VI edizion dal concors par curtrmetraçs “Corto a Muris”, par cure de clape culturâl “Muris in Festa”. Informazions su la rêt des rêts: www.murisinfesta.it e su la pagine “facebook” “Corto a Muris”. La preiscrizion e larà fate dentri dai 30 di Jugn.

[CONVIGNIS]

Te suage des manifestazions udinesis pe “Zornade de memorie”, i apontaments dai 27 di Genâr e dai 17 di Fevrâr, a saran dedicâts a leteradure e “Shoah”. Vinars ai 27 li dal teatri “Giovanni da Udine” a 18, al è programât un confront su la poesie di Paul Celan, cun Emanuele Carucci Viterbi, Luigi Reitani e Cesare Lievi. Vinars ai 17 di FEvrâr, li de sale “Ajace” dal municipi a 15, e sarà fate la convigne “Le letterature della Shoah”, cun intervents di Vincenzo Mengaldo, di Sergia Adamo, di Luigi Reitani e di Anna Baldini.