1 | 2 | 3 | 4 | 5 | 6 |

[SPORT]

Gabriele Torcutti di 8 anni, zuiadôr dai “Madracs” di Udin e soci de Federazion taliane wheelchair hockey (al ven a stâi l’hockey cul biroç; www.fiwh.org), al è stât premiât cuntun ricognossiment speciâl, intant de III edizion dai “Italian Sport Awards”. La manifestazion, inmaneade par segnalâ i sportîfs talians che an passât a àn mertât pal lôr impegn, e je stade fate ai 14 di Mai a Bologne. Difensôr, Gabriele Torcutti al zuie di cuant ch’al veve 6 agn. Cjapant il premi, al à volût dedicâlu a Roberto Filippin, papà dal so compagn Elia. L’hockey cul biroç talian al tornarà a smicjâ il Friûl ai 19 e ai 20 di Mai. In chei dîs, difat, si fasarà a Lignan, li de “Getur”, lis finâls dai campionâts di “A1” e “A2”.

[LIBRIS]

La “Fieste dal libri”, chest an, e vegnarà celebrade a Pradaman cu la mostre-zûc di libris pe frutarie “La casa da sfogliare”. Le à imbastide, li de Biblioteche comunâl, la clape culturâl “0432” e si podarà visitâle fintremai ai 25 di Mai, di lunis fin vinars di 14.30 a 21. Joibe ai 17 di Mai apontaments speciâl par ducj i fruts a 17.

[CONVIGNIS]

La schirie di convignis par cure de clape culturâl “I Scussons”, joibe ai 17 di Mai, e propon une conversazion culturâl di Enza Chiara Lai intitulade “«A peste, fame et bello...». Dame, streghe e benandanti. Vita quotidiana e inquisizione nel Friuli del XVII secolo”. L’apontament al començarà a 21, li de Corte Bolzan-Michelag, te strade Raccogliano di Romans di Gurize.

[SPORT]

Il “Laboratorio internazionale della Comunicazione” di Glemone, joibe ai 17 Mai, al propon une anteprime batiade “Verso London 2012 Olympic Games”. A 13 li de Cjase dal student, la cuistion e sarà frontade dal olimpionic di scrimie Aldo Montano e dal professôr Guglielmo Antonutto dal Cors di Siencis motoriis de Universitât furlane, ch’e colabore te organizazion.

[CINE]

Il film “L’estate di Giacomo” di Alessandro Comodin al à vinçût ancje il “Woosuk Award”, te sezion internazionâl dal “Festival di Jeonju” da la Coree dal Sud. La storie di un zovin sort e mut contade dal regissêr natîf di San Vît dal Tiliment e à bielzà vinçût il “Prémio de Distribuição TVCine” dal “Indie Lisboa Festival” di Lisbone e il “Gran Prix” dal “Festival di Belfort”. Te produzion, al à colaborât ancje il distributôr di Pordenon e di Udin “Tucker Film”.

[MOSTRIS]

Il Parc des Dolomitis furlanis al à tornât a viergi i percors culturâi su la dighe dal Vajont. Dai 13 di Mai si podarà visitâ i lûcs de tragjedie dal 1963 ogni domenie di 10 a 17; dal I di Lui ogni sabide e domenie; dai 28 di Lui ducj i dîs de setemane. Lis visitis a saran possibils indaûr dome di domenie dai 2 di Setembar. La visite e dure un 40 minûts e si po comprâ i biliets li dal ufici su la dighe. Par visitis guidadis di 3 oris si varà di prenotâsi telefonant al numar 0427 87333.

[SCUELE]

La “Mediateca di Cinemazero” e propon ai scuelârs dal Friûl ocidentâl altris doi apontaments. Lunis ai 14 di Mai a 9.15 e martars ai 15 a 11, li de “Sala Grande”, si podarà viodi “Quasi amici”. Miercus ai 23 di Mai, la proiezion programade a 9.35 e je chê dal film “The Ladt - L’amore per la libertà” di Luc Besson. Prenotazions obleadis (0434 520945).

[AMBIENT]

E à tornât a viergi la viere strade de Valceline. Dai 13 di Mai, si podarà percorile ogni domenie di 10 a 17; dal I di Lui ogni sabide e domenie; dai 28 di Lui ducj i dîs e, dai 2 di Setembar, indaûr ogni domenie.

[MOSTRIS]

Si podarà visitâ fintremai ai 27 di Mai, la mostre di strichis chinesis “Isole cinesi”. E je imbastide li dal cine “Visionario” di Udin. Anteprime europeane prontade pal “An dal dialic interculturâl Ue-Chine 2012”, la mostre e je vierte intant des zornadis di proiezions, di 15 a 22.

[LIBRIS]

Vie pal mês di Mai, la clape “0432” e propon i siei “appuntamenti di narrazione” par fruts dai 3 ai 10 agn a Gurize, vinars ai 11 di Mai, a 17 li dal “Centro Lenassi” (“Di fiaba in fiaba”); a Martignà, sabide ai 12 e sabide ai 26, a 10.30 li de Bibilioteche “Elsa Buiese” (“L’ora del racconto”).